新地一直標榜以心建家，繼旗下獨資發展嘅將軍澳清水灣半島收樓，曾安排傳媒視察收樓標準後，噚日再安排傳媒參觀，同恒基、華懋以及南豐合作嘅將軍澳中心二期驗樓過程。
有份出席嘅將軍澳中心副項目總監鍾永添話，二期開始收樓只不過一個禮拜，已向近四百戶發出收樓通知書，其中五至六戶，更加急不及待地入住。
工作人員先以四十磅加壓水柱，模擬滂沱大雨噴向窗戶，測試防滲能力。又在單位內檢查電掣插座，新地特地準備兩個接駁出現問題嘅插座，由屋苑服務員講解接駁錯誤之處，然後又帶記者參觀單位、屋苑會所設施，蘭西好似有份收樓嘅業主般，全程參與。另外，為方便業主搬屋，管理處已準備酒店行李車，幫住客搬較重嘅物件。
近排就會唔會放寬七成按揭上限嘅問題，代理界爭住發表意見支持，立場最鮮明要數美聯，主席黃建業已幾次促請政府放寬按揭救市。
不過，同兼任美聯副董事總經理嘅經絡集團行政總裁黃錦康，意見就有啲唔同，佢話身為按揭轉介公司，對金融體系嘅穩定有一定責任，唔支持放寬樓按上限，所以近排落力宣傳九成按保計劃，等市場認識多啲其他產品。
鰂魚涌太古城最近錄得一宗「長情客」入市個案，個客十年前住喺呢度，後嚟移居美國，近排決定回流香港，堅持要住番太古城。結果用約二百萬買咗星輝台海星閣高層H室，七百方呎。
促成呢單交易嘅美聯物業高級營業經理曾令村講，個客指定要太古城，一日內睇咗三伙，最後揀咗海星閣。
原來佢十年前就住喺隔鄰恒星閣H室，座向同景觀一樣，不過今次買入嘅單位細咗百零呎，因為只係兩夫婦住。
呢名買家一直穿梭中港兩地做生意，喺香港有寫字樓，新界都持有住宅單位，但回流就要住番太古城，睇嚟佢對呢個屋苑好有感情。
信和嘅屯門黃金海岸出租單位，一向係兩年租約，近期就縮短至最少一個月，方便海外回流或者來港短期公幹嘅人士。首批招租三十伙，均在第六座，每戶用咗四萬蚊翻新，重提供家具，全包月租由七百方呎最平八千蚊，至九百三十五方呎每月萬零蚊，已租出六伙。
租務助理總經理田兆源話，黃金海岸有1097伙供出租，約一成可短租。現時租出率八成半，每月有逾八百萬收入，過去一年租金已因應大市減咗兩成一。分層呎租十至十二蚊，洋房呎租十五蚊。
屋苑會所可為租戶安排，往隔籬龍鼓灘睇中華白海豚，信和重同康民署達成協議，喺黃金海岸對開海堤位置，興建十呎幾乘十二呎嘅海豚雕塑，預計年底完成，既美化環境又有地標作用。
中原同美聯兩大代理行嘅市場分析數據爭拗，重有下聞。中原旗下利嘉閣董事總經理何紹章，噚日開記者會時，見佢揸住本好厚嘅書入嚟，大家重以為要上堂㖭。原來佢要引經據典，話美聯嘅動力指數定義有問題。
中美兩間代理行日前已經互鬥一番，今趟利嘉閣加入講埋一份，睇嚟呢單爭拗短時間內都唔會完結。蘭西就覺得係數字遊戲，要有乜結果就會有乜數據。
蘭西
電郵地址：