大市上個禮拜連跌5日，今個禮拜連升3日，又創出今個升浪新高，恒指見10365，收10301，大升117點，成交更激增到161億元，動力咁強，短期大市重會再上。
大市雖然氣勢如虹，但投資者好冷靜，好似噚日下晝，就有唔少人趁高獲利回吐，恒指一度回落近70點，國企股升得急，亦回得快，其實𠵱家市場睇淡者佔較多數，雖有股民本着炒股唔炒市嘅原則，但唔多唔少都受睇淡氣氛影響，個個都打「因住波」，唔上身，貨源轉來轉去，最終落晒基金同大戶手中，大市不跌反升，原因在此。
上個禮拜提過，恒指雖然跌穿上升楔形支持，形勢向淡，但如果上得番，則形勢又會改觀，前日嘅反彈，重可以視為跌穿形態嘅後抽，但噚日就裂口破位而上，確認轉勢，RSI升破降軌，背馳亦不成立。目前最主要關鍵位係10400，若然升破，則有80%會上到11000，有50%會去到11800。
噚日有一類股靜靜地起革命，佢哋就係呢兩個月來冇點升過嘅中國地產股，噚日全部發圍，新世界中國（917）升5.4%、華潤置地（1109）4.7%、北京北辰（588）4.4%，以及百仕達（1168）亦有4.1%進帳。
上述幾家公司中，計PE，百仕達最低，往績只得4.7倍。百仕達除主力在深圳發展和投資地產外，並擁有燃氣及供電項目，呢兩瓣都係現時在內地有穩定增長的業務，合理PE都在10倍過外。集團旗下的百江燃氣（8132）噚日宣布半年業績，營業額7.03億元，升41%，獲利8300萬元，升36%。
百仕達持有百江70.9%，另佔電廠威華達（622）40.4%，兩者合共佔市值17億元，而百仕達本身市值亦僅14億元，股價大大偏低。由於並無特殊項目收益，百仕達03年度（12月年結）盈利會減少，估計仍有2.4億元，每股盈利13仙，以仍屬保守的8倍PE計，股價已可見1.04元。
噚日收市後收到料，話隻Sunday（866）會捲土重來，呢隻股票近日股價曾升至0.415元，之後反覆調整，形成下降楔形，噚日破位而上，且成交增加，有機會再現急升。
郭兆誠