一碟咖喱的威力，原來唔止可以令你辣到飛起咁簡單，更可以令一個人改變。
原本是年少氣盛，性格心急的後生仔，自從十六年前入咗廚房學整咖喱後，「急」呢個字，從此在他的字典裏消失。究竟咖喱有咩咁厲害？問問泰國人Nutkham便知道。
記者：李敏怡
攝影：陳陶鈞
談起咖喱，還不及談起學廚經歷那樣快樂。雖然已是十六年前的事，但Nutkham說回從前在家鄉的事，不時展露快慰的笑容，動作多多，整個人突然活潑精神起來。
那時二十一歲的他，剛踏出校門，便走入廚房當學徒，諗住學番門手藝。就喺芭堤雅某一間酒店嘅廚房，遇上人生最大嘅考驗──煮咖喱。
「煮咖喱首先要執齊所有香料，然後將香料舂爛，呢個步驟至少要半個鐘，之後要用慢火煮椰奶，想咖喱香，呢個步驟一定要慢，否則火太大，椰奶便會燶……」咖喱還未煮好，呵欠已打了兩個。
當時還是學徒的Nutkham有着同樣的反應，但遇着一位惡師傅，有半點唔認真，「啪」一聲，便來一招鑊鏟打手。「跟咗師傅三年，佢講得最多嘅係做嘢要有耐性，將來嘅事就好似煮咖喱咁要慢慢來。」
學成下山，Nutkham很快便來到香港工作，因為覺得香港的發展空間較大。「初來香港的日子是最難熬的，因為老闆唔準出街，怕我會被人請走。」人在異地，自自然然會掛住屋企，就算現在，早已適應香港的生活，但Nutkham仍想着有朝一日可以回泰國工作。「我都差不多四十歲，年紀大了會想家，而且屋企還有一個四歲大的女兒。」不過，將來的事情，正如他的師傅所說，還是要慢慢來。
𠵱家只要你Order一個頭盤或者主菜，加$1就可以叫一碟原價百幾蚊嘅咖喱，每枱限叫一碟，兩個人一枱慳得最多，最平可以二五折價錢就食到一個Lunch。
埋單：$59加一（原價$233加一）慳$174，是原價的二五折
講明係上素春卷，所以一啲肉都無，但就用咗多種蔬果，如生芒果、馬蹄肉、豆腐乾、西生菜、菠蘿肉等，點埋個開胃嘅酸子汁，完全係講求健康飲食或者係瘦身男女嘅首選。
馬沙文咖喱是咖喱家族中最考功夫嘅一種，在香港較難食到。做法是先將所有香料燒一燒，令味道更香濃，然後先至磨碎，再要加入煮好咗嘅椰糖。呢款咖喱喺泰國南部、馬來西亞同印尼較流行，特點係味較濃，加上用咗酸子的關係，所以會有一點酸酸的味道。
埋單：$63再加一（原價：$182再加一）慳$119，是原價的三五折
傳統的泰菜頭盤，用了鮮蝦肉、瘦肉和肥豬肉，加入芫荽碎，再將之油炸。醬汁最為特別，用了椰奶、豬肉碎同埋芫荽，製造一鹹一甜的味道，是餐廳最受歡迎的頭盤之一。
獨特的馬沙文咖喱加入了薯仔和洋葱，配合已去骨的龍脷，魚肉炸得剛剛好，唔會太嚡之餘，重可以有番魚嘅鮮味。
紅咖喱是咖喱中最辣的一種，但又因為呢種辣味令羊肉嘅羶味無晒，連一向見到羊都怕怕嘅人都可以吃得津津有味。由於羊在泰國被視為神聖的動物，所以在當地很難吃到羊肉，此道是屬於較少有的泰國菜式。
咖喱內有泰國茄子，味道酸甜，加上去咗骨嘅燒鴨，鴨肉夠腍又唔韌，估唔到同咖喱嘅配搭亦可以咁夾。
ThaiLemongrass
地址：中環德己立街30-32號加州大廈3樓
電話：29051688
營業時間：
星期一至六12:00nn-2:30pm
星期一至四6:30pm-11:00pm
星期五、六6:30pm-11:30pm
星期日6:30pm-10:30pm