留唔住王牌　英皇改捧新丁
馮仁昭四圍超：吳浩康被欽點做靚版Eason

陳奕迅（Eason）出年約滿英皇娛樂唱片同埋經理人合約後，基本上佢會離開英皇，因為出面真係有好多間公司對佢有興趣，加上據聞佢對經理人霍紋希安排嘅工作有意見，而英皇近排又發生咁多事，所以Eason就唔想再留喺度。
老闆楊受成好清楚未必留得住Eason，已經有心理準備，諗住力捧都唱得吓嘅新秀吳浩康。

唱功好又靚仔
Eason喺樂壇嘅地位，當然唔係話隨便搵個新人就可以代替，如果咁容易，英皇都唔使咁落力留佢啦！吳浩康可唔可以取代佢，𠵱家重係未知之數，但英皇有呢個心要搵呢個新人頂上，聽講係因為男新人當中以吳浩康唱得比較好，加上師姐容祖兒重成日大讚師弟係靚仔版Eason，睇嚟吳浩康都有機會接Eason班啦！

韓星廉晶雅最冧星爺華仔
韓國恐怖片《姊魅情深》將於下周四（二十一日）喺香港上映，主角廉晶雅同林秀晶噚日嚟香港宣傳。問到廉晶雅最欣賞香港邊啲藝人，佢透過繙譯話：「我好欣賞周星馳、張曼玉、張國榮同劉德華。」

楊思琦俾人蝦永豪呵番
楊思琦噚日喺將軍澳電視廣播城，為新劇《青出於藍》試造型，佢話今次可以同歐陽震華同陶大宇合作好開心，到時重可以向佢哋偷師。有報道話楊思琦拍《無名天使3D》成日俾人蝦，緋聞男友李永豪有冇安慰佢？佢話：「我好多朋友都有打畀我，佢（李永豪）叫我畀啲心機囉。」

梁敏儀熊貓眼出院
梁敏儀早幾日因為玩水上活動唔小心撞傷咗隻左眼，瘀到好似隻熊貓眼咁，重碎埋骨，要喺養和醫院留醫，不過前晚佢已經出院，埋單過萬，好彩有保險賠。梁敏儀話醫生檢查過佢嘅傷口，話佢隻眼對落位置有碎骨，但因為傷口未消腫，唔可以做手術，所以畀佢出院返屋企休息，星期五覆診時再睇吓情況喎！

黃家強想幫Band友出碟
樂隊Beyond噚晚喺灣仔新伊館，出席「LifeRocks──HK2003」搖滾音樂會表演，成員黃貫中話：「呢個活動見番好多band友同埋舊朋友，好開心。」黃家強就話：「如果我發咗達，會搞多啲band嘅比賽，同埋會幫有潛質嘅band友出碟，我哋遲啲會開始Beyond嘅巡迴演唱。」

許鞍華做威尼斯影展評審
享負盛名嘅威尼斯影展已經第六十屆嘞，今屆將會喺呢個月二十七號至下個月六號舉行，大會日前啱啱公布咗推選今屆最佳電影金獅獎、最佳導演銀獅獎同最佳男、女主角等大獎嘅評審團名單，其中香港導演許鞍華亦榜上有名，可算相當有面子。而台灣金馬影后劉若英亦會喺另一個競賽組別「逆流項目」擔任評審。