預先講明同大家「後會有期」嘅保安局前局長葉劉淑儀臨別秋波，繼續爆料，幾日前接受鳳凰衛視訪問，大爆婚姻生活。
葉太話當年丈夫臨終前，打咗佢幾次，但唔係「生氣的打」；屋企老人家話畀佢知，一個人臨去世嘅時候，佢最愛嘅人亦係佢最恨嘅人。換言之，即係打者愛也。
聽講話過幾日就去美國嘅葉太早前喺屋企接受鳳凰衛視嘅主持人陳魯豫專訪，大爆心中情，除咗講老公，重講到佢嘅愛女；原來葉太好羨慕人哋做媽咪，三十歲時首要目標係生BB，結果三十九歲時有咗佢嘅囡囡，所以個女對佢嚟講好珍貴。
葉太又話，離職後重有人叫佢做「局長」，早排喺日本火車上撞到一家香港人，當面同佢講：「你永遠係我哋嘅局長。」葉太即刻話自己已經唔係局長喇，叫人嗌番佢做葉太。
講到今次辭職，佢話23條立法唔成，矛頭指向佢推銷得唔好，於是佢就同董生講：「你應該換一個推銷人。」重堅持要董生畀佢走，最後董生都答應。葉太話，想休息不僅係因為喺政府服務咗二十八年，而係心裏面好攰。
鳳凰衛視會喺呢個星期六晚上十一點嘅《魯豫有約》中，首播葉太嘅訪問，翌日上午十一點十五分重播，葉太嘅fans請留意。
傳真︰2623-9278
電郵︰