高手打街波　要贏重要「寸」

喺街場打半場「3on3」，假如吓吓淨係靠高爆籃「屈機」，咁就冇癮到極；分分鐘贏咗都會俾人噓。所以一班香港青年軍組成的「Battlegrounddreamteam」同「dunkteam」，專登閉關苦練三個月，練成幾招「寸爆」過人招數；等大家學成之後，打波有型之餘，重要贏到人哋心服口服。
文：盧漢傑
圖：黃賢創　黃建通

第1招：背脊掩眼法
年僅十六歲的劉奮洋示範呢一招認真新奇，首先趁對手彎腰努力防守，單手將籃球放在對手背脊上，然後用後旋將籃球拉回自己身邊，當對手還在搵波之際，阿洋已經運球超越對手，或在無攔截下遠射。
心思度：☆☆☆☆☆
易學度：☆☆☆
寸爆度：☆☆☆☆

第2招：爆籃摸頭
用身高優勢爆籃，贏波都會俾人噓，但其實爆籃都可以玩吓嘢；好似港青中鋒羅文光，右手運球向內線爆籃之際，左手就突然摸一摸對手個頭，當對手未知咩事之際，阿光已經後轉身上籃得分。
心思度：☆☆☆
易學度：☆☆☆☆☆
寸爆度：☆☆☆☆☆

第3招：通坑渠
唔止踢波可以通坑渠，打籃球一樣可以。大前鋒蘇伊俊就示範籃球通坑渠，首先他假意運球向右，趁對手移步，雙腿分開，就立即將籃球彈地越過對手雙腿；當對手回頭之際，阿蘇已經施施然上籃。
心思度：☆☆☆
易學度：☆☆☆☆
寸爆度：☆☆☆☆☆

第4招：自製籃板
這招適合「恰」較矮的對手，好似身高六呎二吋的港青中鋒劉健明用就萬試萬靈；首先阿明用假動作「fake」起對手，然後用力將籃球扔向籃板，之後再以高速越過對手，搶去進攻籃板球，然後上籃得手。
心思度：☆☆☆
易學度：☆☆☆
寸爆度：☆☆☆☆
以5☆為最高

後記：
以上招數運用在街場，不論成功與否，肯定會激起對手強烈「報復心」，隨時釀成「血案」。不過如果你在「Battleground」三人籃球賽中，灣仔修頓場幾百觀眾面前施展如斯技術，引起全場歡呼，對手只有歎句奈何。