外圍美股果然大幅造好，港股在滙豐（005）帶動下創出今年高位，恒指大升117點，收報10301，成交金額更厲害，高達161億元，創兩年幾新高，港股真係好耐都未見過咁旺場。滙豐逼近100元大關，收報99元，成交接近21億元。
一向被指係藍燈籠嘅九倉（004），噚日急升6.6%，收16.95元。阿虎真係唔知係吉兆定凶兆？市場有傳聞，話佢旗下隻有線寬頻（1097）今日公布業績時，一併公布解決公眾持股量偏低問題，其中一個方案，可能由九倉將有線私有化。有線噚日升4.8%，收2.175元。此股上市招股價逾10元，就算九倉以每股5元私有化，其實都好着數，更何況公司已經有盈利貢獻。九倉現時揸住有線79.24%股權，如果真係私有化有線，唔知九倉使唔使配股集資呢？
中移動（941）則因為派息未能滿足外資要求被質低，逆市下跌1.03%，收19.35元，成交7.45億元，大戶沽盤都相當狠。
政府推出居屋改賓館呢一招，即刻令到酒店股回吐，富豪酒店（078）借勢回吐，跌12.57%，收0.153元。酒店業主聯會即刻大鬧政府唔公道，又話過份干預市場。咁又好難怪，阿董嘅八萬五殺傷力驚人，現時將八萬五嘅貨尾推到酒店市場，酒店業主唔驚就假。
城市電訊（1137）今日推出收費電視服務，噚日股價率先造好，上升4%，收2.60元。今日唔知會否繼續推高股價賀一賀呢？
阿虎