「小姐，你把頭髮又𣲷又硬，想唔想試試最新配方洗頭水？十分鐘幫你洗埋吹埋㗎？」假若行行吓街，有人突然埋你身講以上一番說話，你的反應會是即時彈開，然後又心思思想試，抑或係覺得自己把頭髮好邋遢，好尷尬，但又真係想洗乾淨個頭呢？重未識反應？不如睇睇北角同銅鑼灣街坊嘅反應係點，即刻去片。
記者：尹珊珊 攝影：陳智良 ImageGirl：Irene
Irene知道有得免費洗頭，一馬當先坐在洗頭椅上，兩年來拍過十五條廣告片、摸盡一百個頭的Sinkboy陳振安，摸完Irene把「秀髮」即刻皺晒眉：「嘩！把頭髮肯定又電又染啦！」一摸就知，唔通佢真係神醫？安仔即時反駁：「雖然無正式學過，但拍廣告時一洗就兩日，次次幫十幾個女仔洗頭，點會唔掂。」咁大口氣，即刻睇睇係咪咁得！
試後感：
「估唔到咁舒服，就算俾班街坊望吓都無所謂，但如果有埋熱水就更加好！」
時間：12:00nn-1:00pm
地點：北角渣華道
Case1
話晒做過六、七年電台DJ，安仔的口才有番咁上下，只見佢一手捉住趕去食飯的Kelvin，一邊指住Kelvin的頭髮話：「哥仔你今日個頭好似吹得麻麻喎，等我幫你洗完再吹過啦！」在安仔軟硬兼施下，Kelvin惟有上車，暫時打消去食飯的念頭。
試後感：
「哈，估唔到真係會好似廣告咁，周街俾人捉住洗頭，但都幾好玩，亦無想像中咁肉酸。」
Case2
鏡頭一轉安仔已跑到商業大廈門口，果然唔使幾耐即刻有獵物出現。準備搭車去食晏的Joanna，咁好彩俾安仔睇中，重即時上前捉人，話晒Joanna係女仔，點都會怕醜少少，但係又唔好意思推卻，結果糾纏咗足足五分鐘，終於哄得伊人踏上洗頭專車。
試後感：
「好舒服，隻洗頭水好香，但唔覺得有人參味，咁咪重好，有人參味先怪。」
Case3
勁爽快的Alison一叫就即刻答應，原來係安仔的關係，「我認得佢，佢拍的廣告好得意，好搞笑。」睇佢洗頭時咁陶醉就知啦！
試後感：
「好開心呀！洗頭好涼，好舒服，安仔同上鏡一樣咁鬼馬，好難忘。」跟手Alison重即刻把握機會，合照兼簽名留念。
時間：1:00pm-2:00pm
地點：銅鑼灣記利佐治街
Case4
呢位喺對面街衝過來的Chris，精神狀況異常興奮，一時話要洗頭，一時又話自己多汗，好似好唔好意思，用完手遮面，又用毛巾蓋頭，動作多多。
試後感：
「哈哈，好開心，哈哈（連續五分鐘無停過）……無冷氣差些少，但有風筒同毛巾都已經唔錯。」跟住一直哈哈哈到落車。
Rejoice周街捉人洗頭大大話話都差不多三年了，這部五噸半重貨車改裝成的流動洗頭車，去年年中已開始曝光。但為咗全面配合新產品推出，部流動洗頭車將會以全新形象示人，望落車身依然是勁搶眼的螢光綠，但一拉開鐵閘，就會發現小型Salon搖身一變成為中醫館，Sinkboy陳振安則化身為中醫師，使用新推出的人參滋養洗髮露，幫各位解決頭髮折斷及脆弱問題。想免費洗頭的話，喺嚟緊兩個月(9、10月)就要出多啲街，碰碰運氣喇！
手推洗頭車已退役
如果心水清的話，應該會記得Rejoice三年前的廣告都係周街捉人洗頭，不過當時是用部勁Low-tech的手推洗頭車，第一任Sinkboy由PartTimeModel阿感擔任，直至2001年7月才由第二代Sinkboy陳振安接手。
