香港市民為了要一睹皇馬球員廬山真面目，不惜瞓街幾日，再唔係就重金買黃牛飛，務求見到偶像球員在草地上馳騁的英姿。較為有錢的一群，可以捐數萬元善款，然後望住皇馬球員食一餐飯，望一望碧咸，扒一啖白飯，望一望施丹，飲一啖汽水，值唔值回票價，見仁見智，反正都係做善事。
早知皇馬球員原來都係男人，男人原來都鍾意蒲，咁就唔使咁辛苦瞓喺街，瞓喺酒吧內守株待碧咸就搞掂。話說當晚自己與友人都打算去蒲，揸車去到蘭桂坊附近，只見馬路兩旁橫七豎八停滿車輛，其中一位友人是明星保母，他突然大喝一聲：「嘩！全部都係狗仔隊嘅車，應該有大鑊嘢，機會難逢，大家請攞出紙同埋筆，難得全港報館狗仔隊專用車停晒喺面前，輪都輪到我哋抄番佢哋車牌號碼。」
車子未去到酒吧門口，遠遠已見到警車閃晒燈如臨大敵，望望酒吧對面馬路，只見一大隊記者帶齊架生，每有人行出酒吧閃光燈就閃得有如白晝，情況大致與《摘星奇緣》中茱莉亞羅拔絲落車時一樣。咁又難怪，萬一影到張碧咸攬住個女仔出嚟嘅相全球賣一個圈，想唔發達都難。
咁嘅情形，落車都無謂，但又忍唔住八卦之心，連忙打電話向已在酒吧內之友人攞料，友人直擊報道：「朗拿度為人相當飲水思源，正與多名巴西女模周旋，但每位女士平均只分配到十分鐘；施丹則與一名黑皮膚女伴言談甚歡；較酷的是費高，大部份時間口黑面黑；最好相與的又是碧咸，雖然被大批美少女圍住，但亦只係咪咪笑咁坐定定。」未聽過有人講碧咸一句壞話，作為天之驕子都咁有品，又確然係抵你發達。