近排雖然唔少工業股業績好靚仔，但市場則當係出貨良機，令股價下跌。當然亦有好多係正常反應，公布業績靚，刺激股價大升，好似經紀黃早前推介嘅美力時（1005）就係一個好例子。
經紀黃噚日推介安徽海螺水泥（914），話隻股業績表現勝過預期，加上街貨夠疏，所以估計股價仍然會有好表現。
安徽海螺公布中期業績，股東應佔溢利2.24億元人民幣，比去年同期勁升116.2%。
經紀黃話，雖然安徽海螺呢一年嘅升幅，某程度上已經反映業績靚仔，但成班芬佬估唔到業績超過佢哋預期，加上大部份街貨由幾個大隻佬坐晒，容易炒供求，揸貨最多係台泥國際（1136），其餘主要係芬佬，只要佢哋唔突然出貨，相信股價會繼續硬淨。
另外，呢排好多零售股表現突出，故此周不時傳出有零售股想配股，其中沉寂好耐嘅廸生創建（113），自從出完業績後，股價一直上升，所以亦有配股傳聞，好似話有證券行想搵生意。廸生噚日再升3.25%，收3.175元。
慕容小初