恒指再升90點，地產股有勢，新世界（017）一股當先，可惜冇輪炒。長實（001）收51.25元，升1元，最醒嘅長實Call輪係9764，收27仙，升幅23%，威水輪榜排第12。
9764下月到期，溢價0.9%，槓桿率19倍，未來波幅仍然好大，皆因幾乎平水，而槓桿率又夠爆。
長實Call輪9829，好啱唔鍾意太刺激嘅人玩兩手。窩輪一向只宜炒不宜揸，因為拖得耐會蝕溢價，但9829今年11月先到期，溢價又只得1.1%，蝕晒溢價都只係呢1.1%，所以就算揸得耐都唔怕蝕底，當然大前提係正股有得去。9829槓桿率7.5倍，其實都唔算細。賭耐啲，譬如話賭到尾，正股升10%，隻輪理論升幅係65%。3個月內，正股升10%嘅機會並非唔存在。
國泰（293）炒旅遊同復甦概念，由11.65元彈上12.45元，醒目之人炒國泰Call輪9865與9810，同升26%。亦有人即刻諗起大股東中信泰富（267），中信升4%，收15.45元。賭性重嘅炒家，自然撲落啲中信Call輪，結果龍虎榜上，10大中有4件係中信Call輪，升幅27%至55%，𠵱家仍然想玩中信Call輪嘅話，9604數據最靚，11月到期，現價15.9仙，溢價得0.9%，槓桿率9.7倍，成交唔多係缺點。想買賣容易，則揀9646，明年3月夠鐘，現價11.4仙，溢價6.3%，槓桿率13.6倍。
章盛