香港人面對的壓力的確幾大，甚麼減壓班、紓緩情緒班大行其道，邊種方法先有效？我覺得日本街頭畀錢任打的「出氣袋」最好，打完一身後成個人輕鬆晒，又唔使負責任，喺香港想搵個任勞任怨的「出氣袋」其實都幾難。最近市面便推出真係任你魚肉的出氣沙包，集發洩、減肥、強身於一身，真係好過打真人，係人打完都嗌爽！
記者：區佩嫦 攝影：梁細權
Model：Blanche、Cathy
好招推介
既然有個咁好嘅發洩對象，我哋一於喺街頭捉啲型仔型女試試個沙包好唔好打。為咗增添趣味性，我哋預先印咗喬治布殊、董特首、葉劉淑儀、梁錦松、康寶駒同黃宜弘呢幾位大熱名人的相片，問吓佢哋邊個最抵打。結果出乎我所想，居然黃宜弘同喬治布殊叮噹馬頭大熱勝出，其他的都係揀康寶駒，我最愛嘅董伯伯居然一票都無（實情係個個聽到要見報，費事俾人秋後算帳喎）！
最抵打：喬治布殊
「要揀我一定揀布殊，因為佢主張打仗，令到世界大亂，唔係佢我諗香港經濟都唔會咁差，佢哋美國人又大美國主義，我覺得佢最抵打。」
「打沙包梗係要手腳並用，唔係邊度爽，我覺得將我最憎嘅人嘅相貼上去會特別投入。若果可以俾我自由選擇，平日梗係揀老闆啦！十個老闆九個衰！若果嗰幾日同男友鬧完交，就梗係貼男友張相上去啦！」
最抵打：黃宜弘
「佢份人好無禮貌，枉佢讀咁多書，又話係上流人士，作風連低下階層都不如，佢做錯嘢俾人鬧完都重要死撐，可想而知佢有幾好呀！」
「無諗過個沙包咁腍咁有彈性，打落都幾好玩，用膝頭撞都得。我覺得個沙包好啱香港人，買嚟發洩多過買嚟健身！」
最抵打：康寶駒
「我好憎康寶駒呀！係佢令到我見唔到碧咸，我好鍾意碧咸，我憎到佢（康寶駒）死，梗係要打佢啦！」
「好爽！打得好爽！個沙包比我想像中腍，打落去好有手感，我打時諗住佢係康寶駒，所以打得特別落力！衰人，我要碧咸呀，最衰都係你，令我無得見碧咸！」
最抵打：喬治布殊
「我覺得布殊最抵打，一來佢引發起戰爭，二來成日講大話，當年參選利用華人過橋，𠵱家做咗總統之後，就飛起晒啲華人，唔理華人嘅利益，所以佢最抵打。」
「又幾好打喎！爽唔爽？OK啦！呢個沙包畀我好奇妙嘅感覺，軟硬幾適中，彈力都唔錯，戴咗拳套打一啲都唔覺得痛，二千幾蚊價錢都算合理，買嚟打吓練吓身手都幾好。」
最抵打：黃宜弘
「梗係黃宜弘抵打啦！連我呢啲後生仔都覺得佢無禮貌無教養，就知佢真係幾犯眾憎！」
「個沙包都幾硬喎，我初初以為個沙包會似氣球咁軟腍腍，點知原來咁硬。唔用拳套都得？係喎！打落都唔會好痛，可以接受，個沙包回彈嘅Angle都算OK！佢彈番轉頭有點似不倒翁，幾正。」
「我最憎黃宜弘，覺得佢好衰！個沙包都幾好打！嘻！嘻！我好怕佢會彈到我呀！若果係不倒翁我會開心啲呀！」
呢款過癮嘅出氣沙包由台灣「移民」嚟香港，全個沙包用橡膠啤成，回彈力唔錯。店舖負責人盧先生表示：「一般的沙包以棉芯及沙製成，要吊喺天花板，較為阻碇，而且打時一定要戴拳套，唔係打到手都腫。呢個出氣沙包則用橡膠啤成，打上手夠彈，即使唔戴拳套打都得，打法又較沙包多元化，除了可用一般勾拳外，重可以膝撞、飛踭、前後左右點打都得，總之玩法夠晒多。另一好處係高度可以調校，由155cm可升高至185cm，無論幾高都可以玩到。」這款出氣沙包有人形和水滴形兩款，不過最多人問都係人形，因為可以貼你最憎嘅人的相上去，然後打鑊勁！」
一套四件裝嵌超方便
出氣沙包一套有四件，分別是底座、中柱、柱芯、沙包，這四個部份都可自行裝嵌，鍾意打時就裝，嫌佢阻碇就拆走，夠晒方便。
由於沙包只有20Kg重，所以玩時要將水加在底座中，以固定整個沙包，加了水的底座有成130Kg重，即使你幾大力打，個沙包都唔會塌或者𠱁𠱁轉，用完後放走啲水便可。
售賣點
K.C運動器材公司（24772492）
地址：元朗安寧路69號福安樓地舖
