好多人認識美國索女布坦妮梅菲（BrittanyMurphy），都係因為佢同Eminem合演嗰套《8里公路》，佢喺戲入面飾演為咗向上爬乜都肯做嘅底特律少女，原來喺呢套戲之前，布坦妮亦喺電影《Spun》入面扮過性感吸毒少女，咁有經驗，難怪佢扮啲放蕩角色入木三分。
我羅拉買咗啱啱推出嘅《Spun》美版DVD，比起《8里公路》，布坦妮表現更加放蕩。故事講佢成日同啲豬朋狗友一齊吸毒，最搞鬼係佢唔止成日騷胸，重喺乳溝入面收埋自己嘅「寶物」，得閒就伸手入去攞啲毒品出嚟索！
查實布坦妮嘅放蕩行為同片中其他演員相比只屬碎料，曾經幫麥當娜（Madonna）同Moby拍過MV、近排重為RobbieWilliams嘅《ComeUndone》MV操刀嘅導演JonesAkerland，喺呢部《Spun》入面安排咗好多大膽嘅性愛同吸毒場面，好似男主角就經常用手銬鎖住個全裸風塵女子嚟發洩，畫面上又不時會出現佢吸毒後好瘋狂嘅性幻想卡通，意識極為大膽，所以DVD都要出打格仔嘅rated版，同原汁原味嘅unrateddirector'scut版本等觀眾選擇。