今日經濟環境唔多好，各行各業都緊縮開支，物業管理都唔例外。嘉里建設嘅大埔豪宅滌濤山，兩個月前就減咗管理費，由每方呎兩個二減到個九，即係每呎減三毫子。
屋苑單位最細一千三百七十呎，每個月慳四百零蚊，但洋房就大到近四千呎，一個月畀少近千二蚊，雖然銀碼唔係好大，但今時今日慳得幾多就幾多。
嘉里話，主要係考慮到今日通縮嘅環境，故減省不必要支出後，管理費也相對降低。集團一直都會為物業管理作出檢討，除減管理費外，重會為物業搞資源增值，例如喺屋苑會所引入按摩服務，供住戶使用。
另外九龍倉就話，佢地同地鐵發展嘅九龍站上蓋擎天半島，賣樓花嗰陣，預算每呎管理費兩個三，因應營運成本降低，𠵱家每呎收兩個一。
由策劃翻新、招租至開業，經歷多時嘅旺角新之城商場，噚日首次邀請傳媒，實地參觀商場全新面貌，都算係商場正式開幕前嘅大日子。但原定出席嘅華創物業（香港）有限公司副總經理王春，卻因為事務繁忙，臨時甩底。
據講王春人在深圳，蘭西相信，王副總喺深圳一定大有搞作，先會缺席，好可能公司又有新動作呢！
中原同美聯兩大代理集團，一直鬥得難分難解，近排更進一步，連研究數據都鬥一餐。
美聯噚日登咗個全版報章廣告，話佢哋睇好樓市嘅評論已經相繼實現，重話對手數據顯示，現時二手樓價低過「沙士」期，實屬荒謬喎，又舉例天水圍嘉湖山莊708呎單位，「沙士」期間成交價71萬，但7月就造到87萬，升咗近兩成三。
不過中原都不甘示弱，羅列成交個案證明自己講得啱，如沙田第一城四十二座二十五樓A室，三百九十五方呎，3月28日以呎價2051蚊易手。但到7月2日，同類成交呎價只係1722蚊，跌咗一成六。嘉湖山莊美湖居同呎數嘅個案，8月比3月重跌一成八㖭。
今個月嘅矚目大盤係長沙灣宇晴軒，負責賣樓嘅長實高級營業經理郭子威近排頻頻撲撲。噚日先同經絡集團開招待會，公布樓按安排後，嗱嗱臨趕去美聯嘅宇晴軒推介會，向代理講解樓盤嘅優點。美聯營業董事羅國安話，樓盤可吸引區內外人士入市。
另外，郭子威上個禮拜四出席中原宇晴軒誓師大會，透露會厚待經紀，咁各代理要努力嘞。
有位投資者三個月內以四千五百萬，先後買入西貢大街三十三至三十九號物業，同西貢海灣酒店，市場一直以為買家係猶太人，宏億置業方國珊就澄清話，買家係住喺香港幾十年嘅澳洲人至真。
呢位有米又有諗頭嘅「老香港」老外，構思要喺近海邊嘅西貢大街搞露天茶座。
蘭西諗，佢或者會參照祖家澳洲悉尼達令港嘅露天茶座風格嚟做都未定噃。
蘭西
電郵地址：
