聯儲局議息前，美股反覆靠穩，杜指周一晚升29點，收9217，納指在連跌6日後反彈1%，收1661，其實賽果好正常，但噚日港股好友當好消息出擊，殺到淡友一頸血。
前日港股升148點，唔少人如趙飛雲之流都話成交唔配合，技術仍受制於10日線及升軌，但噚日恒指即刻以117億元大成交再升90點，收10184，重返10日線及升軌之上收市。
其實趙飛雲早市仍唔肯認輸，中移動半場休息時公布業績冇驚喜，派息比率只有19%，午市開市即急跌，帶動恒指回吐，但淡友攻勢只係曇花一現，好友又再控制大局，中移動由低位急彈，見勢色唔對在0.203元沽出中移動Put輪9758，白做始終好過輸錢。和黃（013）尾市升至50.75元水平，雖未升穿Put輪9905的止蝕位，但見到好友勢盛唔想捱打，所以先沽出9905止蝕。但港股始終要調整，可待確認見頂後再出擊。
趙飛雲深明股市唔可以逆勢做嘢，但近排港股調整訊號相當明顯，諗住恒指先下試9500整固，然後再展升浪，所以開始買Put輪，點知港股連升兩日又再轉危為安，Put輪整體計數仍有錢贏，但先前沽出嘅股票繼續大升就損失大，例如重慶鋼鐵（1053）噚日收2.70元，中旅（308）收1.50，香港興業（480）收1.95元，如果唔係炒出炒入，實在唔止贏咁少，反映牛市要賺大錢，揀啱股票就一定要長揸。
趙飛雲