若然貴價車類都乏人問津的話，相信香港車市已達谷底嘅境地；好彩政府終於開竅，重新修訂汽車首次登記稅，寧願少收稅項刺激市民買車，總好過開天殺價，連帶有錢嘅商賈名人都望而卻步吖！
當中，獲得重生嘅除咗有平治Maybach、勞斯萊斯Phantom之外，早前原定車價要成300萬嘅林寶堅尼Gallardo高性能跑車，響新稅制修訂後車價回落至248萬，因而吸引到唔少Fans追捧，至今聽聞已接定單有成十幾部咁多，相信老闆LeoWong都飲得杯落喇！呢部被譽為係「Baby林寶」嘅Gallardo，除手波版外，其實重有一款全新E-Gear嘅半自動波型號，雖然買家要多畀十幾萬才可以擁有E-Gear嘅Gallardo，惟亞Mark聽聞亦不乏捧場客呢！據知，首批新車快者可望於11月前抵埗，若然想響年底前成為首批Gallardo嘅車主的話，就真係要快一步落定喇！皆因意大利人造車部部都要求完美，反而效率係次三、四位，新車到港往往有遲無早㗎！