中移動（941）中期業績不過不失，但市場好似唔係好滿意，午後股價回軟，一度倒跌至19.25元，不過市場憧憬外圍可能繼續造好，所以唔敢過份將中移動質低，最後收報19.55元，升0.25%，成交達5.41億元。港股在長和系帶動下，上升90點，收報10184，成交達117.53億元。
藍籌股陸續公布業績，下一輪的焦點將係長和系，此系焦點在於3G發展，據聞市場對3G態度已經冇之前咁負面，加上美林調高美國科技股評級，可能會帶挈和黃（013）造好都唔定。
中國製藥（1093）中午公布業績，中期賺3.6億元，大升2.6倍，派中期息7仙，刺激股價午後勁升11%，收2.975元，成交達1.73億元。管理層重事先張揚，話明年會派特別股息，又話會引入基金股東，真係有咁好唱到咁好。
Cookie話，中央要挽救香港經濟，已公布一連串措施。佢重聽到有中資人士好唔抵得香港嘅特殊地位，因為香港已經擁有一個自由市場，𠵱家重可以享受到計劃經濟至有嘅「國家補貼」，所以會考慮調多啲資金落嚟香港玩。
最近中小炒家追炒酒店旅遊股，噚日輪到大戶勁炒航空股，國泰（293）獲美資追捧，勁升6.9%，收12.45元，成交達3.64億元；東航（670）與南航（1055）分別升逾7%，中航興業（1110）更升10.4%，成交均逾1億元。黑客話，聽講芬佬重未買夠航空股。
阿虎