日前徐濠縈同陳奕迅（Eason）一齊睇皇馬對中港聯球賽，之後又拍拖到銅鑼灣唱Ｋ，似乎以行動粉碎感情亮紅燈嘅傳聞。但係早排有雜誌影到徐濠縈每晚都有唔同嘅男性朋友陪去街，其中一個就係新秀出身嘅劉浩龍。
劉浩龍同徐濠縈一向都幾好感情，又成日一齊去街同睇演唱會，而且次次都係由徐濠縈做埋柴可夫㖭！
劉浩龍同徐濠縈日前重約埋一齊去跑馬地馬場附近踩rollerblade，貪嗰度夠靜兼地方大，佢哋重旁若無人咁，玩得鬼咁開心，唔知點解識玩rollerblade嘅Eason又唔去嘅？
許秋怡同王書麒噚日去法國醫院接囝囝出院，因為囝囝出世時有啲面黃黃，所以要留院觀察。秋怡同書麒心情都好緊張，因為早前非典型肺炎肆虐，所以冇參加育嬰講座，佢哋都好擔心第一晚湊BB會雞手鴨腳。秋怡話：「個個都話BB似書麒，所以我要對住佢多啲，等佢都似我！」
梁敏儀日前因為出海玩水上活動受傷，噚日喺跑馬地養和醫院留院觀察，梁敏儀隻左眼周圍都瘀晒，佢話：「醫生今日未巡房，所以唔知幾時可以出院，我希望可以盡快出院。𠵱家醫生開咗消炎藥畀我，都未知使唔使做手術。因為我入院時曾經嘔吐，醫生驚我有腦震盪。」梁敏儀留院期間，英皇三T同楊受成夫婦都有去探佢。
汪禹前晚接受有線娛樂新聞台訪問，講番早幾晚佢去咗前度女友杜貞貞喺跑馬地開嘅酒吧，打咗杜貞貞一巴嘅事。前晚汪禹言語間又暗示件事同錢銀轇轕有關，佢講講吓重整爛自己副太陽眼鏡，話以前嘅事就好似副眼鏡咁唔再存在，希望圈中人可以畀個機會佢拍番戲。
韓國變性藝人河利秀，噚日喺台灣任張菲主持嘅綜藝節目嘉賓，佢哋兩個重玩到扮嘴對嘴，鬼咁投入。河利秀一身打扮，性感誘人，重勁歌熱舞一番。張菲又即場寫咗封情信畀河利秀，大讚對方好有女人味，又充滿自信，令人好舒服。張菲又話：「她很有女人味，已經超過最美女人的定義。」
