公益金借皇馬球員籌款，一個晚宴籌到二百幾萬，可見香港嘅善長仁翁好多，只要有名人號召，個個都肯隨緣樂助。公益金嘅籌款委員會召集人柯清輝夠面子，要員余錦基與足球圈好熟好熟，所以籌款晚會搞得好熱鬧。
左丁山冇資格參加，但睇報紙知道兩位相識吳守基與陳煒文分別以十萬元、六十萬元投到兩個足球，上有球星簽名，但點解價錢有咁大分別呢？吳守基係馬圈名人，與馬主協會主席陳耀星及家人、校友等擁有「通勝」、「義兄」、「極品」、「喇沙精神」、「喇沙神童」等馬匹，出十萬買個波，濕濕碎。陳煒文係上市公司「萬威國際」（IDTInternational）嘅主席，截至2002年3月底嘅營業額有22億，呢位香港理工校友百足咁多爪，識得好多世界名人，在電子產品界享譽甚隆，理工大學一座建築物好似叫做陳鮑雪瑩大樓（ShirleyChan）就係佢捐款二千萬，用佢太太名字嘅。
六十萬與十萬之別，就係碧咸親自主持拍賣，陳煒文與碧咸影番張靚相，碧咸班人逗留晚宴一個鐘頭就走咗，掛住去夜總會Wet、酒吧飲酒作樂也，至於對香港隊，佢哋邊會放在眼內吖。上星期三佢哋初到香港，幾位大牌明星晚上九點幾就去晒Dragon-I，朗拿度喺貴賓室與巴西模特兒左擁右抱，卡洛斯與香港模特兒舉杯，飲到凌晨三點，碧咸兩次去廁所，都入咗女廁，其中一次被人提醒，急急走番出嚟，喺出邊等嘅女士對佢講：「我哋唔介意噃」，不過碧咸就好有禮貌，讓番畀啲女士喎。