皇馬來港同香港隊作賽，掀起全港足球熱，無綫當晚收視率勁破紀錄，最高達到五十點，有成三百二十四萬觀眾捧場。眼見全城歡騰，於是有人游說足總會長霍震霆，年年搞一次咁嘅大賽，等香港人開心吓。
八方聽聞霍公子仍未為所動，唔知係咪因為今次賣飛搞到大混亂，所以唔敢輕舉妄動。咁不如搵老霍出山，不過知情人話，霍英東已經放晒手畀個仔搞，唔會再插手。
講起賣飛，八方上周寫過皇馬大賽要市民早四日排隊買飛，足總有人辯稱係球迷想保留印刷精美嘅飛尾留念，所以唔用網上售票，真係好笑。今次大賽安排，充份顯露足總之保守落後，同世界運動產業大勢脫節，難怪香港足運全無起色，連泰國都不如。
該文見報後，有讀者來電郵，亦大鬧足總守舊。原來佢早前去泰國睇利物浦賽事，喺香港網上訂飛，不知幾方便，點使瞓四晚街？到咗泰國，攞飛亦易如反掌；而波飛設計精美如信用卡，同香港啲冇得比。大家睇睇，係咪更有紀念價值呢？
傳真︰2623-9278
電郵︰
