在餐廳裏，我們遇見Sandy。像大多OL一樣，從前Sandy每天返工前總會悉心打扮，穿好整齊的套裝，化上一個端莊的淡妝；返的是朝十晚七的工，一天工作至少八小時。在經濟不景下，很多人覺得這種生活已經很幸福，但Sandy卻忍受不了這種生活，於是放棄了努力多年的OL身份，轉了行。現在每天開工前還是要化妝，但化的妝卻大大不同，唇膏用多了，眼影顏色也鮮豔了，塗上雙頰的，不單是胭脂，還有閃閃的銀粉。因為她化的是一個小丑的妝。
記者：李敏怡 攝影：黃子偉
Model：陳天藍、May、Stephen（richstrategy)
逢星期一至三、五出版
「以前做成衣工作，每日返十點，放七、八點，放工後重要陪老闆食飯，食到九點幾，返到屋企，咁又一日，真係好似成世人畀咗老細咁！」Sandy無奈的說。
再加上「全球化令很多工作上已有的規條都得以打破……」，所以Sandy便鼓起勇氣辭咗份工，同老細講我唔做OL，我要做小丑。
「𠵱家啲小朋友愈來愈唔開心，佢哋唔知咩叫快樂，日日就好似坐緊監咁。」Sandy說。
於是Sandy就同佢哋來個大解放，玩扭氣球，玩畫面，再加上一啲即興搞笑動作，等佢哋嚟餐廳食嘢都唔會坐定定，成嚿木咁。
「以前做SalesandMarketing，同人溝通係有目的性。但𠵱家做小丑，但小朋友溝通，單純只係𠱁佢哋開心。有時見到啲好開心嘅小朋友，自己都會特別開心，特別鍾意。」原來小丑姐姐都會偏心㗎。
無論係份量或食物選擇都係為小朋友度身訂做。好似呢個肉醬意粉，係正常份量嘅三分之一，而香蕉船亦細咗二分一，大廚Eric話嚟親呢度嘅細路仔，通常都可以一個人食晒個Combo，唔會浪費食物。除咗意粉外，重有迷你Pizza、迷你漢堡等。
這是餐廳的招牌菜，差不多每一枱都會叫一碟。地中海式的串燒，將帶子、青瓜和西椒一齊放入焗爐燒，火候恰到好處，不會太乾，卻有燒烤的惹味。再點一些泰式醬汁，香濃的椰奶味與海鮮的鮮味原來可以如此合拍。
從澳洲運來的茄子，比一般的較大，切片炸熟後，一層叠一層，每層之間用了濃味的Parmesan芝士，頂層則用了淡味的Mozzarella芝士。
入口鬆脆，蘸點番茄汁更能帶出茄子的鮮味。
電話：28136161
地址：赤柱美利樓2樓201號舖
營業時間： 11:00am-11:00pm（星期一至五）
11:00am-11:30pm（星期六）
10:30am-12:00mn（星期日）
小丑時間：逢周日1:00pm-3:30pm