章小蕙昨晚起程到台灣十日，將她在中環的時裝店餘貨徹底促銷。台灣之行後，章小蕙會帶同兒子嘉浚赴美開學，她謂已為兒子找了一所軍校入讀，每年學費需數十萬元，由她與前夫鍾鎮濤（阿B）分擔。
章小蕙位於中環的時裝店昨日終停止營業，她在記者面前依依不捨地鎖閘，並表示晚上會帶同時裝店的百多箱餘貨往台灣，作徹底傾銷。
章小蕙說：「間舖結束，啲熟客比我重唔捨得，佢哋三代同堂咁嚟探我。不過之後我會有新計劃，下個月我會去紐約同歐洲入貨，因為遲啲會用番呢個舖位，開間lifestyleshop。」
章小蕙續說：「間舖唔係淨係賣衫，會有啲lifestyle精品賣，話唔定我重會喺舖入面煮咖啡畀啲客飲，而現時呢班職員，我會照聘用佢哋。」
問章小蕙是否轉型做才女？她說：「才女冇我份，蠢女就真，我啲朋友成日話我賺錢慢，啲衫一件件咁賣，寫稿一粒粒字咁賺。」
章小蕙又透露結束十天台灣之行後，會帶同一對子女嘉浚（BonBon）和嘉湄往美國，她說：「除咗去旅行外，最重要係同BonBon辦入學手續，BonBon今年十三歲，我幫佢搵咗間軍校，可以鍛煉佢獨立同EQ，間學校學費唔平㗎，要幾十萬一年，呢筆費用我會同阿B夾份支付。」
早前章小蕙表示與Wilhelm分手，是不能適應太過有規律的生活，如今她又把兒子送進軍校過有紀律的校園生活，她說：「阿媽接受唔到軍訓，咪到個仔囉。」
採訪、攝影：RitaLeung、JessicaNgan
