性格小生舊年好開心咁同身邊嘅人講，話自己識咗個開舖頭嘅女仔，初時佢哋都幾好，點知小生後來先發現個女仔原來重有一個闊少男友，佢間舖都係個闊少打本畀佢開嘅，小生當然接受唔到個女友一腳踏兩船，於是就迫女友做決定，個女友於是就話已經同個闊少分咗手啦！點知實情唔係咁，佢依然係一腳踏兩船，小生好嬲，結果飛咗佢。
咁啱青春玉女又甩拖，佢同性格小生偶然又會走埋一齊玩，但佢兩個都明知對方唔係自己真正要搵嘅對象。而性格小生個老闆女友一直都幾鍾意出風頭，又鍾意跟住過氣天后，背後重成日借過氣天后嚟自我宣傳，過氣天后成世人都俾人利用，唔知幾時先會醒啲。
鄭希怡（Yumiko）、蔣雅文、楊受成同霍紋希噚日先後喺養和醫院出現，馮仁昭起初以為佢哋去探陳伯，一問之下，Yumiko話其實喺去探朋友，唔係陳伯，佢哋探完病後，Yumiko就話：「我哋嚟睇WinnieLeung（梁敏儀），佢做嘢嗰陣撞到隻眼，碎咗骨，塊面瘀晒又好腫㖭呀。」
汪禹前晚走咗去前度女友杜貞貞喺跑馬地開設嘅酒吧踩場，有消息話佢打咗杜貞貞一巴，結果被警方拘捕。噚日汪禹接受有線訪問時，問佢究竟有冇打杜貞貞，佢話：「可能拍咗佢一吓，可能係有小小誤會，但我都俾人扯衫扯領呔。」汪禹唔肯講今次係咪同錢銀有關，但就口口聲聲話件事過咗去就算，而下個月八號，佢要再去警署報到。
許志安今日三十六歲生日，噚日生日前夕，佢一早走咗去滑水，下晝就約咗幾間報館做訪問，安仔話一早滑水好攰，所以夜晚唔會約人慶祝喎。噚日下晝安仔喺尖沙嘴洲際酒店做訪問時，咁啱俾馮仁昭見到張智霖同女友袁詠儀一齊坐住架四驅車出現，原來佢哋約咗王家衛同澤東高層飲嘢，唔知係咪傾合作呢？
成龍噚日接受商台訪問，提到佢個仔祖明，成龍話：「你唔提起我都唔記得我有個仔，因為我慣咗單身。佢（祖明）冇事都唔會搵我，可能呢啲係報應，我哋兩個幾月冇聯絡。」問成龍佢嘅仔會有幾大壓力，成龍話：「佢好大壓力，所以佢同黑人打波，有人問佢點睇JackieChan，佢話唔識我。」
