經紀黃噚日滿面笑容，皆因佢睇中嘅美力時集團（1005），自上周五公布理想中期業績後，股價果真一鼓作氣上升，噚日勁升11.4%，收2.15元，創下一年新高。
雖然美力時股價累積升幅唔細，但經紀黃話唔使擔心，皆因美力時PE只係單位數字，比較一眾獲基金垂青嘅工業股，仍算便宜，加上隻股有人在維持秩序，估計再上升的機會仍大。
另外，獲一眾炒家歡迎嘅首長寶佳（103），股價長升長有，由0.40元升至0.85元高位後才出現回吐。
噚日有美資大行出報告唱好，但內容就冇乜新意，大概係話首長寶佳生產嘅鋼簾線，係汽車輪胎嘅原料，以家陣大陸汽車業發展咁勁，呢行嘅發展極有潛力，有排都滿足唔到需求。首長寶佳暫時未因大行品題而升，噚日跌2.6%，收0.75元。
小初忽然記起，首長寶佳阿媽首鋼香港，喺5月份曾以0.315元認咗一批新股，家陣帳面都賺唔少，唔知會唔會有人食胡？
慕容小初