晨早10點，氣溫攝氏32度。曬到精神煥散的記者、攝記連保母，正慶幸今天跟Boy'z拍照的只是群6至8歲、「未懂追星」的小球手，斷唔會大膽攔截偶像。話未說完，偷聽到場外曬到滴汗的小妹妹同媽咪講：「等陣係咪可以入去同Boy'z哥哥影相呀？」
記者：陳慧敏
攝影：楊錦文
鳴謝：香港網球總會
身為網總網球大使的Boy'z，打網球雖仍屬初學階段，但是進步神速，更得到教練誇獎，「球迷」激賞。問他們為甚麼愛打網球，Kenny：「健康、有益、又好玩！」咁「行」嘅？「最緊要係唔使好似足球、籃球咁，要約好多人至開得場，兩個人一得閒就打得喇！重可以練手臂！」Steven：「貪新鮮囉！而且我本來就鍾意啲跑來跑去嘅運動。」最愛蒲點係維園網球場，暫時傾向打10點前後的早場，配合工作時間兼且冇咁曬咁話。
自言擊球率只有50％的Steven對球衣要求得兩個：「一定要淺色同大一個碼，着深色衫未跑已經熱死啦！大件啲出汗都唔會黏住個身嘛！」今日他穿的是網總提供的大碼運動衫，極盡網總大使之責。另一邊廂，Kenny則立刻拿起自己件橙紅色Fila：「我好鍾意呢件㗎！我着咗幾次喇！（拉開尼龍布料）你摸吓吖！個料又軟又跣汗，胳肋底位唔會一撻汗迹（笑）……（「欣賞」咗一陣）橙紅色撞白色都好靚吖！」
總括而言，超薄、輕身、透氣舒爽就是Boy'z網球戰衣條件，記者根據上述條件，為大家搜來至正網球服。執個靚Look去維園蒲蒲，說不定有機跟Boy'z二子過兩招呢！
網球初哥Boy'z的選衫條件睇嚟都好專業，不如又睇睇其他波友嘅要求。
店舖資料
(a)FilaShop（29555500）
尖沙嘴海港城234號
(b)RoyalSportingHouse（25060112）
銅鑼灣Timesquare6樓617-621號舖
(c)馬拉松（25063139）
銅鑼灣Timesquare6樓616號舖