經過多事的七月，老董內閣走嘅走，升官嘅升官，總算塵埃落定，於是大家齊齊放假唞唞。八方做咗個小統計，三司十一局中，噚日最少有兩司四局「並不在位」，亦有人準備外遊。
唐英年臨危受命，為平衡家庭同工作，唐公子決定按原定計劃上周五同家人去歐遊，但就縮短行程，由兩周變一周，到時馬時亨就甩難，佢由周五起放假到月尾，聽講要陪女兒去美國開學。原來馬仔個女英國中學會考攞咗十個A，馬仔太忙出席唔到個女嘅畢業禮，今次算補數。
至於煲呔，上周六扮勤力出洗街報告，原來佢趕住放假，咁啱平時頂開佢嘅孫公又放咗假，結果要勞煩王永平揸一陣大旗；平叔已經係第二次署理政務司司長個位，可謂駕輕就熟。
林瑞麟亦去咗歐洲度假，十四號先返工，其間由常秘麥清雄負責處理政制事務局嘅事務，有嘢可以用長途電話問林局長功課，故此毋須其他局長署理佢個位，又幾新鮮。
八方早前講過，葉澍堃出訪完東南亞會放假，而廖秀冬七號已經開始為期兩周嘅充電之旅，除咗楊永強預先張揚呢個暑期一定唔放假之外，連李國章都話計劃緊幾時去玩。
其實咁至正常。雖然政府高層真空有點奇怪，算係特區問責制特色。至於董建華，佢就仍然咁勤力，原來佢個女同啲外孫放暑假返晒嚟，有孫玩，敍吓天倫，老董一於半步唔走開。
傳真︰2623-9278
電郵︰