正職係GraphicDesigner嘅Jerry，個個星期日都會嚟餐廳扮小丑同小朋友玩，奇怪嘅係第一眼望見佢覺得佢總係CoolCool哋，就算換咗小丑衫都仍然唔多出聲，無厘神氣好似未瞓醒咁；不過，當有小朋友入嚟餐廳，Jerry就即刻判若兩人成個生猛晒，帶住燦爛笑容開開心心逗小朋友玩，自助餐枱上為小朋友而製嘅班戟、鮮果撻同蛋糕，統統都及唔上小朋友們同Jerry嘅笑容甜美。星期日放假都捱眼瞓晨咁早起身上山頂，全因Jerry覺得：「最、最、最開心嘅事就係同小朋友玩！」
記者：馬慶武 攝影：楊錦文、黃子偉
Model：張紀正、張惠詩、Eric、Cinmi（金富策略集團）
除咗奉獻寶貴嘅星期日假期之外，Jerry喺公餘時間都會用嚟教小朋友做話劇，一有時間就同小朋友一齊。咁鍾意小朋友，全因為Jerry所有兄弟姊妹都結晒婚，生咗好多仔女，所以Jerry成日都俾好多小朋友圍住，同佢哋玩得多，漸漸發覺就算年齡有好大差距都一樣玩得好開心，而且重發覺自己好有同小朋友玩嘅「天份」，控制到佢哋之餘重可以吸引到佢哋嘅注意力，加上Jerry係香港出世嘅菲律賓人，英文又得，廣東話又掂，無論同本地小朋友或者外國小朋友都溝通得好好。
𠱁到小朋友開心有成功感，自己又可以乘機輕鬆一下，難怪Jerry話：「同小朋友玩重開心過放假。」
由今個星期開始，峰景餐廳每個星期日都會有小丑坐鎮。由於Jerry有教開小朋友做話劇，幫慣小朋友化妝，所以最在行就係幫小朋友喺臉上畫得意圖案，而Jerry重話每個星期都會安排不同節目，好似今個星期會幫小朋友畫臉，下個星期就可能會教小朋友小魔術，重有整動物氣球等活動，個個禮拜都有新鮮感咁話。
峰景餐廳
地址：山頂道118號山頂廣場2樓
電話：28495111
營業時間：平日11:30am-12:00mn；星期日9:30am-12:00mn
自助餐價錢：成人：$250；小童：$125
自助餐供應時間：逢星期日11:00am-2:30pm
(現每兩個成人惠顧，一位12歲或以下小童可獲免費。)
山頂除咗峰景餐廳有自助餐食又有小丑搞氣氛外，Shooter52、MovenpickMarche等餐廳都設有兒童區域，特別體貼照顧小朋友。其中Shooter52兒童區內就有小型滑梯，木馬仔等玩意設施，小朋友嚟到定必開心到紮紮跳，Shooter52重剛剛推出咗兒童新菜單，有齊Pizza、熱狗、漢堡包呢啲小朋友至愛食物，而且全部都係迷你版，份量啱啱好，小朋友一定鍾意。
Shooter52
地址：山頂道118號山頂廣場地下
電話：28385252
營業時間：11:00am-11:00pm
