香港小姐競選期間，安排候選佳麗到外地拍外景已經係指定動作，今屆除去泰國外，上個禮拜六日重去中山星晨花園取景。
聽樓盤嘅銷售代理置業國際講，上個周末舉辦嘅星晨花園睇樓團，總共六團都爆晒棚，另外，今個月大部份睇樓團都額滿，𠵱家只係得平日先有小量名額。
點解今次反應咁熱烈，除咗有港姐候選佳麗效應，聽講團費好抵，只係比平時嘅一日團收費貴些少，就可以喺當地住一晚，公務員重有特別優惠㖭。
當日發展商重搞咗個攝影比賽，有近二百人參加，焦點梗係一眾佳麗啦，佳麗們都好識做，擺咗好多姿勢，任影唔嬲。
今次港姐候選佳麗去完星晨花園之後，樓盤又多一個宣傳賣點。呢個發展咗十年嘅樓盤，業主超過九成九都係香港人。
在港掀起足球旋風嘅皇家馬德里球隊，上個禮拜同港隊比賽，吸引唔少城中名人去睇波，發展商都唔例外，早排推出買樓送波飛嘅九龍倉，助理董事黃光耀（圖二中）當晚同太座、營業經理梁秉權、同埋擎天、碧堤買家一齊睇波，中原地產高級分區經理史世德就相當有面，係獲邀請之列。
聽講黃生好鍾意運動，重攞過多個羽毛球同乒乓球賽獎項。嗰晚自然睇得好投入，不時歡呼吶喊。
房協因應社會轉變，集中火力興建長者屋，提供一站式包括房屋、社區康樂同醫療服務，不過對象係有足夠經濟能力而又年屆六十歲或以上嘅人士。
房協位於將軍澳培成里嘅長者屋，經已落成，今個禮拜會請傳媒參觀，禮拜五開始接受申請。
房協為推介呢個計劃，最近重喺報章賣全版廣告，以喚起市民注意。
地產代理同發展商搞記者會，愈來愈有娛樂性。利嘉閣噚日為畢架山一號第二期搞活動，深化同事對呢個盤嘅認識，方便促銷。會上就搞個惹笑有趣嘅話劇，由幾名經紀上演一幕希臘神話故事。
內容係由經紀扮演嘅眾神，商議要遷神殿，宙斯就發夢見到一組蜿蜒星群，認為係上天畀佢哋嘅啟示，於是眾神討論神殿需要嘅環境同設施等要求後，利嘉閣經紀推介新神殿最佳之選，就係畢架山一號嘞。故事果然配合大會主題。
大連市最近舉行夏季房屋交易會，四日共吸引近十二萬人次參觀，售出樓面三百幾萬方呎，總值十一億五千萬（人民幣，下同），均比上屆略多。
戴德梁行話，今次展覽會有幾個特別現象，一個係二手房銷情唔錯，佔四百四十八套，樓面三十四萬方呎，總值約八千萬。
第二係雖然大部份高檔項目都賣得唔好，但小型戶就特別暢銷，好似二百幾至六百多方呎嘅單位，成交超過一百三十套，總值四千萬。呎價約四百六十至六百零蚊，都算幾貴，但因為面積細，售價唔使四十萬，好受城市年輕白領同小投資者歡迎。
蘭西
電郵地址：
