是日大球場內真真正正座無虛席，上次睇利物浦時尚發現山頂與山邊有少量空位，今次就真係有櫈就有人坐，就算冇櫈都照有人坐，我隔籬樓梯就踎咗幾件，踎足全場都唔見佢哋腳痹。全場起碼有一半唔係嚟慣大球場嘅球迷，因為照計全場爆滿，好容易就可以玩人浪，但無論坐大鐘底的年輕人起哄多少次，人浪去唔到三分一就斷纜，全場未出現過一次能兜到一個圈嘅人浪，有點遺憾。
碧咸先生的萬人迷魅力無限，全場青春少艾美少女無數，只要在大銀幕上見到碧咸，即時鬼揸咁嘈，萬試萬靈，碧咸轉會皇馬後，雖然比在曼聯時更賣力，亞洲之旅的幾場比賽，見到碧咸係咁走嚟走去，除了偶爾一兩腳的美妙傳送之外，未見有大建樹，碧咸能做的，其他球員也能勝任有餘，當然碧咸的最大任務，其實是招徠女球迷，但不知費高、施丹、魯爾這些粗豪真漢子是否看得慣，相信碧咸要融入球隊，尚需一段時間。
本來以為特區政府咁鬼馬，借邀請皇馬訪港為名，其實係委任23號球員碧咸為推銷23條特派專員，碧咸推銷23條，我諗唔使一個禮拜就可以得到一半以上市民支持，鍾意點立法就點立法。