詹培忠放聲氣，明年決定參加立法會直選，選區就是香港島。港島區目前有五位直選議員：李柱銘、楊森、余若薇、蔡素玉、何秀蘭，民主派佔咗四位。勞斯詹嘅定位模糊，暫時唔知係親近民主派還是親近保皇黨，但有一樣好清楚嘅，就係佢口才了得，活動能力強，由達官貴人以至販夫走卒，大小經紀，各路人馬，佢都有針有線。唔好以為佢入過赤柱就會減弱號召力，赤柱經驗重可能為佢拉到啲兄弟票㖭。
據政壇名嘴講，最緊張勞斯詹參選嘅，唔係民主派，而係中聯辦，因為中聯辦好驚勞斯詹拉走保皇黨選票，益咗民主派。蔡素玉嘅票會喺北角、福建人聚居之地。勞斯詹係潮州怒漢，潮州話與福建話都係閩南語系，勞斯詹怕有辦法去撬福建幫選票噃！
因為明年冇咗選委會推選嘅議員，立法會主席范徐麗泰一早想話參加港島直選，中聯辦亦想捧范太，擠走何秀蘭。但係七一之後，民建聯好驚自身難保（睇吓深水埗區議會補選，民建聯大敗，就略知一二），點敢輕易應承配票畀范太呀，何況加上勞斯詹搗亂局㖭？如此一來，范徐麗泰、蔡素玉、何秀蘭都冇必勝把握。其中以蔡素玉得民建聯全力護航，可以睇高一線，范太只係五五波，如果佢輸咗，董生、中聯辦都會好唔高興。好彩明年直選議員增加六個名額，港島區如果爭多一席，變成六席，范太就會定啲。