好多男士都好鍾意儲figure，但相信冇乜人會好似松本人志咁，鍾意儲之餘重自己出埋迷你膠公仔，而松本月尾推出嘅「松本人志世界之珍禽異獸」系列，未面世已經被廣泛報道，重講明今次係第一批，擺明以後長出長有，究竟係因為松本勁，定係啲公仔正呢？
我羅拉就覺得係因為松本嘅構思夠出位，而且啲公仔二十蚊隻夠平！
呢啲所謂珍禽，其實全部都係松本天馬行空諗出嚟，包括十隻腳似蟹打橫行嘅「豬蟹」、住咗三隻猩猩嘅「寄居哥」、好似人咁行嘅「白領文鳥」、擺落口食嘅嘢全部要洗兩次嘅「潔癖熊」，同埋放屁先飛得起嘅「屁之鳥」等，總共十二隻。
大家可能覺得呢批figure無中生有，簡直無聊之極，但出咗名靠無聊起家嘅松本，深信呢十二隻怪獸啱晒figure迷嘅口味，佢一本正經話：「我哋唔係噏得就噏，我哋由上年秋天開始設計，形狀同顏色經過無數次改良，好辛苦！figure嘅作用就係𠱁人開心㗎啦，你睇埋每隻怪獸嘅詳細解說，可以有無限聯想。」似乎松本今次想證明佢唔係淨識滾㗎！