美國男籃為本月稍後舉行的奧運外圍賽開操，76人球星艾華遜在感謝其前球會教練布朗（亦是美國隊教練）的「拉攏」，得償宿願得以入選國家隊外，表明將全力以赴為美國取勝。 路透社
去屆先至加盟熱刺嘅中場列納，向來都係「玻璃腳」，但係領隊荷杜就好欣賞佢，話佢係今屆隊波嘅喼頓。我求大俠記得佢上屆只係踢過十七場波，入咗三球，冇乜特別；話唔定今屆做咗隊長後，季初落力得滯又整親，搞到熱刺冇首領，咁到時就重濕滯嘞。
各位球迷應該可以繼續見到李鐵着住愛華頓件波衫比賽，因為領隊莫耶斯話會方差不多已經同「鐵爺」達成錢銀上協議，可以喺禮拜六聽候差遣。我求大俠為「鐵爺」高興，同時希望佢可以喺英超攞到首個入球，或者較早之前佢喺熱身賽射入世界波係好嘅預兆呢！
阿仙奴龍門列文認真騎呢，佢響前晚慈善盾互射十二碼時左搖右擺，樣衰唔在講，最慘係波又撲唔到，連史高斯射入完都忍唔住笑。後尾佢唔搖就即刻擋出雲尼斯達羅個波，唔怪得賽後唔少網民都喺留言區攞呢樣嘢嚟笑。不過五球波佢總算有四球吼到路，呢吓就唔講得笑囉。