德國波開咗鑼、慈善盾又踢完，各位睇完咁多場波之後，有冇發覺好多場比賽節奏偏慢？又難怪嘅，熱浪席捲歐洲搞到天氣酷熱，落場球員似受難多過比賽，強隊要贏弱隊都唔容易，導致和波同下盤特別多。今日波迷出手玩歐洲賽時，記住唔好算漏咗天氣因素至好。
呢股熱浪認真厲害，好似前晚場慈善盾，唔夠三十分鐘已經有球員要搵水照頭淋；同日史特加對柏林哈化場德甲，連球證都要場邊職員幫佢抹汗。
北歐雖然都受呢股熱浪影響，但點都冇南歐咁熱。所以今日歐洲較北嘅國家南下踢歐洲賽，恐怕佢哋頂唔住。嗱，呢個係我求大俠個人心水，信不信由你。
相信十八歲仔嘅格連莊臣好難忘記呢個暑假，因為佢除咗以六百萬鎊由韋斯咸轉會車仔後，聽聞因曼聯後衞加利仔同布朗都受傷，所以英格蘭領隊艾歷臣有意首次召用佢友賽克羅地亞。睇怕格連莊臣今年真係好紅，我求大俠祝佢好運，亦都希望車仔踢到啲好波俾大家睇。
去屆先至加盟熱刺嘅中場列納，向來都係「玻璃腳」，但係領隊荷杜就好欣賞佢，話佢係今屆隊波嘅喼頓。我求大俠記得佢上屆只係踢過十七場波，入咗三球，冇乜特別；話唔定今屆做咗隊長後，季初落力得滯又整親，搞到熱刺冇首領，咁到時就重濕滯嘞。
各位球迷應該可以繼續見到李鐵着住愛華頓件波衫比賽，因為領隊莫耶斯話會方差不多已經同「鐵爺」達成錢銀上協議，可以喺禮拜六聽候差遣。我求大俠為「鐵爺」高興，同時希望佢可以喺英超攞到首個入球，或者較早之前佢喺熱身賽射入世界波係好嘅預兆呢！
阿仙奴龍門列文認真騎呢，佢響前晚慈善盾互射十二碼時左搖右擺，樣衰唔在講，最慘係波又撲唔到，連史高斯射入完都忍唔住笑。後尾佢唔搖就即刻擋出雲尼斯達羅個波，唔怪得賽後唔少網民都喺留言區攞呢樣嘢嚟笑。不過五球波佢總算有四球吼到路，呢吓就唔講得笑囉。