陸氏實業今年三月用超高價2.6億元，向董事長陸擎天增持成藥公司維康力六成半股權，陸擎天當日怕俾記者追問急急腳走人，噚日終於交功課，推出名為VI-28抗衰老中成藥。佢同老婆鄭嬙話，今次發財係因為阿爺。
陸氏之所以搞中藥，係因為五年前董特首搞中藥港，啱啱陸擎天阿爺係中醫，令佢想起去保險箱搵吓阿爺有乜剩落，點知真係俾佢搵到條保腎壯陽嘅藥方，兩公婆自己做白老鼠，又搵埋班朋友試，除咗冇傷風感冒外，重唔使戴老花眼鏡，風濕腳又冇發作，於是搵科大同北京大學測試，發現條方可以加強腦下垂體分泌生長荷爾蒙，提高人體免疫力；同時透過亞洲抗衰老協會對二十五個老年男士進行測試，發覺有壯陽功效。但問到食咗三年嘅陸擎天效力究竟有幾強，佢就笑笑口話呢啲係私隱喎。
（圖）陸氏實業董事長陸擎天自己做白老鼠，話佢隻藥確有功效。
傳真︰2623-9278
電郵︰