豐田汽車近年致力研製混合動力版本嘅車款，而繼Prius及EstimaHybrid後，佢哋又為旗下頂級MPV車系Alphard，推出Hybrid混合動力版本，從而為環保盡一分力。
AlphardHybrid同樣以電油引擎及前後兩組交流電馬達作配搭，其中一台2.4公升直4DOHC引擎（馬力：131ps/5600rpm；扭力：19.4kgm/4000rpm），而前軸一組電馬達最高輸出則為13kW/1130-3000rpm，扭力11.2kgm/0-1130rpm，後軸一組電馬達輸出則為18kW/1910-2500rpm及11.0kgm/0-400rpm；而車子於起步時嘅動力來源，全由一台2.4公升電油偈負責。至於加速時，電腦更會控制後軸一組電馬達驅動後輪，從而形成四驅模式，令操控及加速表現更上一層樓；而煞車時就會改由兩組電馬達提供動力，電油引擎亦會停止運作。另外於行車時，電馬達亦會帶動發電機，並將電力儲於蓄電池內，以供電馬達使用呢！有如此配搭，難怪平均耗油量僅17.2km/L，比普通2.4版Alphard來得更慳油呢！
雖然新車嘅造型看似與普通版相近，但頭泵把、鬼面罩、頭燈及尾燈皆用上新設計，能令人一望而知其身份外，就連車內各項豪華配備亦被保留下來。未知香港各大車行，何時會引入呢款講求環保嘅流動豪宅呢？