翁虹自小與兄長的感情甚佳，更幻想過長大後嫁給哥哥，而小時候最難忘的事，是激嬲哥哥，被他打了一巴。因母親管教嚴，規定女兒要念乘數表，念不到不准吃飯，所以翁虹小時候不喜歡母親。
翁虹小時候性格比較男仔頭，她用「儍吓儍吓」來形容自己。從少開始翁虹已發現自己有演藝細胞，幼稚園畢業時，她已上台做話劇。
到十七歲，翁虹因為喜歡演戲，所以入讀演藝學院，排舞老師朱永龍曾是她的同班同學。
談到選亞姐的點滴時，翁虹日前說：「當年選亞姐，地點就喺演藝學院，我喺演藝讀過四年，對於表演已經有啲經驗，而且嗰度一草一木我都清清楚楚，佔盡天時地利，所以選亞姐時我對自己好有信心，最後選到冠軍，其實都係我意料中事。」
談到家人，翁虹和哥哥的感情自小已很好，小時候她更經常幻想自己嫁給哥哥，翁虹說：「我諗唔少有哥哥嘅女仔，細個都可能諗過，如果大個可以嫁畀哥哥就好啦！我一直好鍾意哥哥，細個連瞓覺都要黐住佢瞓。」
翁虹續說：「記得有一次我激嬲咗哥哥，地點喺中環皇后像廣場，當時佢打咗我一巴，由細到大都係得嗰一次咋，我即時喊得好傷心，唔想再同佢講嘢。不過，我份人唔記仇，轉頭就冇事，而且哥哥事後有同我講對唔住，我亦有同佢道歉。」
談到母親，翁虹表示家教很嚴，所以小時候不喜歡母親，她說：「每逢放暑假，阿媽每日會畀六十條數學題我做，做唔到就會用間尺打我。記得有一次媽咪病咗，佢都要我背乘數表，背唔到就唔准我食飯。媽咪做衰人，阿爸就做好人，所以嗰陣我鍾意爸爸多啲。」
採訪：張止寒
