上星期個市死死吓，5日皆黑，恒指直跌303點，昨日則生龍活虎，彈番148點，大約一半，期指升幅又大過恒指升幅76點，睇嚟個市又再玩過。
市場注意力喺晒啲CEPA股，大路嘢和黃（013）收50元，升得60仙，相對落後。個市玩番上去，唔會冇呢隻重磅股，博和黃Call輪，應該會有好派彩。
和黃Call輪搏殺格，係隻9765，下月初到期，壽命係短啲，但勝在槓桿率24倍，夠晒爆炸，買賣又唔難，現價20.8仙，上月高位45仙，𠵱家重差一大橛。和黃現價50元，上番53.5元嘅話，9765即可重見45仙，超過1倍利潤在後頭，係好有潛力嘅發達輪。
中移動（941）上周又係俾人當作地底坭，5日跌足1.50元，昨收19.50元，升番2.9%。中移動今日派中期成績表，一般估計多賺1成以上，往績PE12.1倍，預測PE接近10倍嗰頭，點算偏高？今日中期若然係咁意派啲中期股息，隻股好難唔應聲彈起。敲中移動Call輪，搵銀之道，主角係9861，年底到期，現價25.5仙，溢價5.3%，槓桿率7.6倍。
中移動另1隻Call輪9846，壽命長過9861個幾月，數據靚啲，不過成交金額只及9861唔夠兩成，冇9861咁方便炒賣。短炒始終要揀9861。
章盛