潮州人生日會食啲乜？非山珍海味也，而是簡單一味粉絲雞蛋湯。原來粉絲加雞蛋，在潮州人心目中有代表長壽之意，所以每當生日當天必會飲呢個湯。祖籍潮州的Florence，趁着父親還有數天就生日，決定親自下廚炮製呢款意頭湯水以孝敬父親。與此同時，知道爸爸亦鍾意食家鄉芋頭炒飯，就一次過送晒畀佢。Florence爸爸果真即時笑不攏口，重大讚阿女廚藝有番佢咁上下。
記者：伍旋卓攝影：林栢鈞
今次所介紹的兩道潮州菜用料都非常簡單。Florence雖然在酒店工作，每日面對及食過不少美味佳餚，但她表示最鍾意還是吃父親所炮製的家常潮州菜。
「我自小就吃父親煮嘅潮州菜，例如：反沙芋、糕燒甜品和蜜餞柑桔等，其中最愛就係粉絲雞蛋湯同埋芋頭炒飯。因為每年生日，爸爸都會煮粉絲雞蛋湯畀我飲，話有長壽之意思喎。」
粉絲雞蛋湯用料雖然好簡單，只用粉絲、雞蛋、豬肉等，但事前準備工夫就一點也不簡單，例如豬肉要預先醃最少2小時；粉絲則要揀純綠豆製造的；雞蛋要煎至外脆內軟等，每個步驟都要好講究。「咪睇炒飯以為好易，要炒到夠乾身，又唔會太過肥膩亦有學問。睇阿爸煮得多，以為好易，自己親手做，試過四、五次嘅失敗至成功。」
潮州人認為，粉絲和雞蛋代表長壽，所以傳統潮州菜中，就有呢味粉絲雞蛋湯作為生日時飲用。據老一輩的潮州人透露，以前呢味湯是將整隻雞蛋烚熟，再放入粉絲和肉片內煮湯食用，做法較簡單。但為了增加食味，今時今日已將烚蛋改以煎蛋食法，蛋重要煎至帶金黃色澤、外脆內軟，令湯具色香味美。
用咩料：
雞蛋 4隻
半肥瘦豬肉 200克
粉絲 50克
冬菜 少許
葱 1棵
芋頭炒飯是潮州人於八、九月必食的時令食品，因為呢個時候芋頭又香又粉腍，芋頭和白飯混成一體，有口感又香口。而且原來芋頭脂肪含量只有0.2克，纖維又多，老人家都啱食，Florence爸爸好鍾意呢個炒飯。
用咩料：
芋頭 226克
臘腸 1條
免治豬肉 200克
米 約200克
葱粒 1棵
蒜茸 少許
調味：
鹽、糖 各1茶匙
生粉、生抽 各1茶匙
