自由行及CEPA效應令酒店及零售股禾雀亂飛，獲國內民企家陳洋南提出全面收購嘅珀麗酒店（149），噚日復牌急升2.2倍，收報22.8仙，比起收購價每股9.04仙高出1.52倍，但成交只得275萬元。e莉莎話，此股街貨早已被吸光，真係想炒幾高都得。重組後，珀麗只剩下國內資產同個殼，基本上唔會受惠於CEPA，不過此股有注資概念，可以作為炒作藉口。
有酒店業人士話今個月初入住率超過90%，酒店股借勢炒上，泛海酒店（292）勁升95.7%；富豪（078）再炒高56%。有旅遊業人士話，沙士之後，好多內地旅行團因本港酒店供不應求嚟唔到，現時就算加快興建酒店亦趕唔切，其實孫公何不將現有未售居屋新盤，改建為同胞旅舍，每日收租150元，月收4500元，咁重好過當公屋出租啦，而且重可以考慮將呢類同胞旅舍以REITs形式分拆上市。
中移動（941）公布中期業績前，有消息話會派中期息，刺激股價上升2.9%至19.50元，帶動港股升148點，收報10093，不過成交就只有75.79億元。
中資股普遍造好，不過持有東江水嘅粵海投資（270）好似出現漏水，股價被質低12%至1.30元，成交高達9530萬元。有傳聞話，中央向廣東省施壓，要求降低水價紓解香港經濟困難。近排中央向香港大施慈愛，阿虎真係感激不盡，但如果因此而破壞合約精神，日後對香港的負面影響則難以估計。
阿虎