近呢兩年，MP3機同MD鬥個你死我活，兩者都遇到同一樽頸，就係功能上無甚突破，一味玩款同減價嚟留客。JNC就回歸原點，以享受音樂掛帥，推出新款MP3同對應嘅喇叭機座，不論返工搭車或睡房浴室，隨時都可享受心愛歌曲。
記者、攝影：徐影龍
ImageGirl：Patsy
今次JNC呢套MP3Hi-Fi套裝，雖然屬兩種唔同嘅產品，用家大可分開獨立購買，不過成個套裝相當之合襯，絕對可以絕配嚟形容，JNCFans值得考慮。新機外形跟上一型號差不多，同樣以圓柱體為外殼設計，加上金屬銀色機身及鏡面屏幕，賣相相當之討好。體積及重量都好輕巧，長時間掛喺頸都唔覺重，活像一支女士唇膏咁輕巧方便。
七色發光屏幕、FM收音同錄音等功能，彷彿已屬潮流必備指標，雖然功能眾多，不過新機加入圖像顯示介面，以圖示分門別類咁展示，配合十字按掣，轉換功能話咁易，最抵讚係類似Windows嘅樹狀檔案結構，幾十首歌曲可分開擺放，搵起上嚟都零舍容易。雖然不設任何記憶卡插槽，不過新機分別有128MB及256MB容量嘅型號，儲歌或錄音已足夠一般用途，較體貼係採用普通3A筆芯電，補充方便靈活之餘，重可播放十小時音樂，夠晒長氣襟用。
至於同期推出嘅MP3喇叭套裝，其磨砂機座專為JNC一系列圓柱形機種而設，放入MP3機真係又靚又高貴，亦方便接駁喇叭時作固定之用。喇叭部份，單睇外形又係相當之煞食，高高之黑柱形夠晒氣勢，最特別係頂部嘅音源部份，採用360°多方向發聲設計，音源非常之廣闊，亦較為貼近人耳水平，音色自然更為清晰自然。單睇一組喇叭同機座，已知非將貨就價之附屬品，獨立賣價$198亦唔算貴，筆者甚至覺得JNC機主值得一併買埋機座，當時款擺設都唔錯。
其實呢套喇叭機座並非JNCMP3專用，雖然機座放機位置唔係任何型號都對應，不過市面亦有好多其他牌子嘅圓柱形MP3機，加上喇叭採用最普遍嘅耳筒式插頭，用家大可接駁至各類音響裝置，作擴音之用。
捷訊科技查詢：29262250