銀行前輩H賜飯，席設「洞庭春」，顧名思義，「洞庭春」賣湖南菜，湖南人以吃辣著名，「洞庭春」啲菜式豈會不辣。左丁山唔食得辣，想話唔去。前輩H喝住：「唔使驚喎，有賓架F打點，一定正。」賓架F係「洞庭春」熟客，由佢代前輩寫菜，我哋啲廣東佬一定食得落。果然有賓架F坐鎮，未見過「洞庭春」有這般高水準，一味「鴨舌」尤其過癮，不過師傅T就對經理講：「舌即蝕音，食鴨蝕，唔好意頭，以後寫菜，要叫做鴨脷，大家有利。」經理乃年輕女子，一時想唔通，唯唯諾諾而去。
前輩H請食飯，送埋靚酒，兩瓶白酒雪到凍晒，入口清純，好快就飲晒，唔使返工嘅老友就繼續飲RoyalSalute，賓架B話：「要成千二蚊一枝㗎，靚到冇得頂。純飲唔溝冰更妙！」可惜左丁山下午要開工，都係唔敢喇。順便問佢：「乜啲白酒咁正？」賓架B曾被JohnnieWalker邀請去試酒，唔止BlackLabel，連BlueLabel都試埋，對洋酒認識，多過左丁山一百倍，佢話：「今日嘅白酒係AlbertPic1997，最啱飲，遲啲就怕老咯。」紅酒不怕老，白酒怕老，最緊要飲得及時。此日食嘅湖南菜，全部不辣，一味「主席紅燒肉」（毛主席係湖南人），正到痹。賓架B話：「湖南人嗜辣有一句話：不怕辣，辣不怕，怕不辣！」呢句話真好，我哋啲寫稿佬就係不怕寫，寫不怕，怕不寫。不寫就食穀種咯。