我羅拉睇見Morning娘（晨女）嘅矢口真里咁嘅貨色，都可以學人出水着寫真，佢哋到底重有乜嘢冧人法寶？似乎晨女唯一嘅噱頭，就係出動第六期嘅三位妹妹仔成員，影水着寫真𢱑銀。
睇見平均年齡只有十四歲嘅道重沙由美、龜井繪里同田中麗奈三位𡃁妹，着住比堅尼好拘謹咁對住鏡頭影寫真，真係覺得佢哋唔係好專業，可以話表情同動作都極之生硬，難怪連田中自己都話：「睇本寫真，覺得自己個樣好怪！」
呢本由三位最嫩口晨女孭飛嘅寫真集《HELLO!×2》，擺到明走陽光與海灘嘅穩陣路線，冇晒新鮮感同刺激感。三位小妹妹奉命去到沖繩石垣島取景，重好似發現新大陸咁開心，又好奇咁話啲沖繩人個個曬到黑掹掹，佢哋又一齊笠住水泡落水，又互射水槍，好似幼稚園啲小朋友咁！
道重沙由美話拍呢本寫真嗰陣，覺得好怕醜，但係自己已經盡咗力。雖然佢哋嘅表現唔係好專業，但聽講日本啲叔叔反而覺得正斗，尤其三位小妹妹食雪糕嘅合照，更加令班麻甩fans想入非非，三位小妹妹亦都話佢哋食住雪糕影相嗰陣最開心，唔通佢哋唔怕肥？