亞姐出身嘅名媛羅霖周日帶同愛子，參觀設喺尖沙嘴嘅何文田豪宅君頤峰示範單位，佢話物業座數唔多，地勢高，景觀好，但強調今次純粹嚟睇吓，又話自己好鍾意睇樓，之前重曾經考慮過考經紀牌㖭。
之不過，據可靠消息講，羅霖對君頤峰一千七百呎，同二千呎單位最有興趣，佢屋企人早幾日已經嚟睇過樓，佢就第一次嚟，唔知係咪家人叫佢幫吓眼呢？
當被問到點睇樓市，羅霖回應，未來一年都唔會有咩好轉，不過，如果自住唔係炒樓就應該冇問題。至於政府可能減釐印費，她認為，對樓市幫助唔大。
另外，恒基地產營業部總經理張炳強，噚日下晝同助手一齊參觀上環ManhattanAvenue示範單位，大讚物業樓底高十呎、位置好、間隔又好，逗留咗半個鐘至走。
近排新盤開售少咗啲，樓市稍靜，代理乘幾放假鬆一鬆，費事有盤開時行唔開。利嘉閣董事廖偉強今日就舉家出發去日本旅行，周末至返港，聽講佢以前已經去過日本好多次，對當地景點應該好熟悉。
廖生喺舊年十月過檔利嘉閣之後，一個禮拜返足七日工，每日超過十二個鐘，今次係第一次放假，佢咁安心出門，睇嚟利記嘅改革都應該完成，公司運作暢順。
另外，利記董事總經理何紹章，據聞今個月底，會去廣州行個圈，充吓電食吓嘢。
寫字樓價跌咗幾年，差唔多到咗見底嘅階段，但係造價就冇晒標準，特別係啲幾十萬嘅單位，卓先測量師行聯席董事潘子明話，最近旺角就有啲寫字樓買賣，同一座大廈，售價喺一兩個月內相差十幾萬，由三十幾萬大升到近五十萬，升值六成。佢話，既然造價咁低，預期後市有條件反彈。
畢架山一號二期整咗個以電單車HarleyDavidson做主題嘅示範單位，哈利迷長實趙國雄，噚日就發動一班志同道合嘅人士，三十部大大架哈利電單車，晨早喺紅磡國際都會平台集合，然後由下屬郭子威鳴槍主持起步儀式，車隊朝畢架山一號地盤進發，再返紅磡。但唔知點解老趙全程都係坐人車尾，自己唔揸。
幾十部電單車一齊起動時，隆隆聲搞到成個平台都震晒，噴出嘅廢氣都幾難聞。
睇六七十年代嘅電影，會見到好多二房東三房客，或者業主租客住埋一齊嘅場面，估唔到呢個現象再次歷史重現。
蘭西最近睇到祥益地產一個租務成交，屯門居屋美樂花園1座高層G室，六百八十方呎，月租兩千蚊，超平租，打個電話了解吓，原來只係租其中一間房。
佢話區內一啲已補地價嘅居屋，有部份業主係單身嘅，自住一間房，將另一間房出租，收番啲幫補吓，一般月租兩千蚊內。
祥益話最經典例子，係居屋兆山苑六百八十方呎單位，間成四間房，一間自住，其他三間就以月租千六到兩千蚊放租，房東有成四千幾五千蚊收入，慳慳哋可以唔使做。𠵱家屯門區有三四個呢啲放租盤，當中有私人屋苑啟豐園。
蘭西
電郵地址：
