黃卓玲小時候常跟隨攝影發燒友父親，到皇后像廣場影相，不過自從幼弟出世後，父親對弟弟甚為愛錫，令黃卓玲十分妒忌。有次因自己和妹妹照顧不周，令弟弟跌親流血，兩姊妹怕父親責罵，為此驚到騰騰震。
小時候長得胖嘟嘟的黃卓玲，日前透露出世時十足毛孩和皮膚較黑，她表示可能與媽咪懷孕時，工作是做假髮，以及每日飲可樂所致。
黃卓玲說：「你唔好睇𠵱家好似幾白咁，其實我本身係黑底，我細個又肥喎，所以喺幼兒園，我一直瞓最出嗰張床，等人知道嚟呢間幼兒園讀嘅細路肥嘟嘟。」
黃卓玲的父親甚愛攝影，幾乎每個月都會帶她去皇后像廣場拍照，故此其童年照片特別多。黃卓玲有一妹一弟，原來她小時候十分妒忌弟弟。
黃卓玲說：「我爸爸鍾意仔，細佬出世，佢好開心，我就開始妒忌。最記得有一次放假，全家人去咗我姨媽屋企，我同細妹就喺花園照顧細佬，點知細佬撞親個頭流血，爹哋帶佢去醫院，我同細妹就好驚，一直等爹哋返嚟俾佢鬧，最後爹哋返到嚟，點知係咁意話咗我哋幾句。」
黃卓玲續說：「可能因為覺得爹哋偏心，加上佢管教好嚴，所以我細個唔係好鍾意佢，黐媽咪多啲。朝早我會做晒家務先返學，八歲就識得買餸煮飯，都幾叻㗎。𠵱家我哋全家人感情都好好，大個之後，爹哋反而最錫係我，我哋一家人乜嘢都會講，我識咗男仔都會同佢哋講。」
撰文：張止寒
