都話韋斯咸個領隊羅達管理球隊能力麻麻啦！前晚英甲聯開鑼，隊波無錯贏普雷斯頓打響頭炮，不過羅達喺用人方面似乎有問題喎，又再惹嚟球員不滿嘞！
前晚韋斯咸作客贏普雷斯頓二比一，真係要歸功於後備入替嘅前鋒干奴利一箭定江山。事實上干奴利係韋斯咸今季收購之一，喺季前熱身賽亦一直係正選，點知到呢場正式賽事，個正選位竟然俾啱啱喺利物浦借番嚟一日，只跟過一小時操練嘅美拿搶咗！難怪干奴利大罵羅達對佢唔公平，用人不當啦！
其實之前同迪肯尼奧不和、收咗人六百萬鎊轉會費，至話格連莊臣唔應該去車路士等等「騎呢」行徑，睇嚟羅達要好好檢討至得，隊波唔齊心，點爭升班啊！
前晚英甲聯首輪賽事，失球最多嘅球隊竟然輸畀華素爾一比四嘅西布朗，真係令人跌眼鏡！估唔到西布朗上英超打個轉，返番去甲組會搞成咁！而華素爾贏波功臣麥臣亦好爭氣，射入兩球，剝晒喺季前批死華素爾係英甲降班膽嘅莊家牙骱！
蘇格蘭乙組會艾爾德利突然間成為風頭躉，原因並唔係佢哋踢波勁，而係因為搵到間脫衣舞夜總會做贊助商。以後佢哋球場廣告牌肯定有唔少豔照，話唔定間夜總會派啲索女喺半場休息整場豔舞表演……，在場睇波嘅唔興奮至奇啦。
上個禮拜六英甲聯一開鑼就畀唔少話題我哋，最難過莫過於接連收到兩個英格蘭球圈人士嘅死訊。首先係前布力般領隊夏福特卒於癌病，享年五十九歲；事隔無耐，由曼聯外借到屈福特嘅戴維斯因車禍喪生，佢只係二十一歲，話唔定將來有機會發光發熱，咁就去咗，真令人惋惜。
阿根廷教練比爾沙前日點兵備戰下個禮拜對烏拉圭，千呼萬喚終於肯精銳盡出，連啱啱加盟車路士嘅華朗都入選，真係強到唔強。最令人興奮係後生仔迪阿歷山度都榜上有名，證明比爾沙幾睇重佢，呢位德甲禾夫斯堡新寵兒，有機會就要好好把握嘞。