過去兩周大市走勢唔多就，原本升得好哋哋嘅工業股，大部份都停晒手，但因為股價仍然處於高位，所以有部份比較驚青嘅芬佬想趁機減持，套回多少現金。
經紀黃話，其實又唔使咁擔心，有部份工業股由於盈利能力同息率俱佳，相信芬佬暫時唔會收手，好似上周五公布中期業績嘅美力時（1005），盈利6200萬元，比起去年同期上升43.6%，兼夾有0.08元股息派，表現相當靚仔。
美力時股價喺呢個零月，由1.50元升上嚟，一度高見2.05元，估計係有春江鴨活動之故。上周五股價升1.05%，收1.93元，成交金額則只有190萬元。
美力時近期升幅雖然大，但PE仍然維持單位數字，家陣稍為有錢賺及有息派，同埋比較肯同投資者溝通嘅工業股，PE動輒都十幾倍，美力時炒落後嘅藉口充足，稍為擔心係市況唔就。
雖然美力時大股東手上仍有一批可換股債券，可供低價行使，但以早排芬佬乜都肯坐嘅表現嚟睇，有人肯接晒亦唔出奇，好似早排黛麗斯（333）咁，AIG行使所持嘅可換股債券，兼且沽晒畀芬佬。
慕容小初