恒指上周5日皆跌，計埋唔見303點，滙豐（005）全周最高98.25元，最低95.50元，波幅2.9%，收96元，5日跌75仙。
滙豐盤數幾乎公認話唔錯，但股價又唔上得，皆因公布前已升咗唔少，而市場氣氛又麻麻。但又跌唔出乜樣，皆因盈利比預期好，同國際同業比較又唔算貴，滙豐短期唔易大升大跌，只會上上落落，可以吼跌時趁低買Call輪。
滙豐Call輪9845成交多，溢價唔高，槓桿率大，最啱炒上落。隻輪12月初到期，輪價34.5仙，溢價2.6%，槓桿率27.8倍。滙豐若然上升，則唔適宜趁低位買滙豐Put輪博正股回落搵錢，理由係啲Put輪普遍溢價唔低，就算計埋正股派息拉低正股因素，喺有唔細溢價情況下揸Put輪，都冇乜着數，要計埋滙豐中長期走勢都係向上呢個因素。
中石油（857）上周最高2.425元，低收2.25元，又有機會反彈，值得趁低買相關Call輪。中石油Call最熱鬧嘅係9901，上市個幾月，近日跟正股由高位回落，雖然明年8月先到期，壽命唔短，但輪價23.1仙，溢價去到29.4%咁高，槓桿率9.7倍。將來，溢價肯定無法企得咁高，博中石油Call輪，呢件唔值得買。要買，寧可揀槓桿率較低但溢價亦低或者負溢價嘅9797或者9232。
章盛