十二位準港姐行程緊密，昨日從中山返港，又即打沙灘排球，7號王從希憑出眾身材贏盡男士歡心，更有人口多多大嗌：「從希好波！」但王從希似乎很受落，離開時更主動向口花花的男士講拜拜。
無綫《2003年度香港小姐競選》十二位候選佳麗昨早繼續在中山星晨花園作親善訪問，大會安排眾佳麗抽鎖匙開門入屋，幸運兒可得五千元獎金，結果由10號譚靜雯奪得。十二位佳麗完成儀式後，即馬不停蹄趕回香港，前往黃金海岸泳灘打排球。
眾佳麗穿上迷你裙在沙灘上分成兩組對壘，引來不少男泳客及地盤工人圍觀，部份巿民更一早抵達霸定位睇港姐，觀看排球比賽的以男士居多，當中不乏赤膊上身的男士及紋身漢，而年輕一族及阿叔也不放過昅女機會。
一眾圍觀者在看排球之餘，不忘口花花撩女仔，7號王從希與20號戚黛黛均成為在場男士的焦點，二人不斷獲得歡呼聲。當王從希準備發球時，有男士即大叫「從希好波」，而戚黛黛的名字則被男士取笑，叫她做「戚春黛」，二人可謂各有支持者，兩批fans更互相爭拗，支持王從希的人謂：「呢個位梗係支持大波啦！」看來王從希的身材還是最吸引。
雖然如此，但王從希仍十分受落，離開時更主動向口花花男士講拜拜。對於被讚「好波」，她說：「佢哋叫我打得好啲啫，我相信佢哋都係欣賞我嘅優點，所以冇俾佢哋嚇親，唔會尷尬。」而戚黛黛則剛巧相反，她笑說：「好多男人，嚇鬼死我吖，好彩我開到波，唔係就搞唔掂，咁多人睇住會有壓力，佢哋咁樣叫我好老套呀，但都幾好笑，我唔會介意，因為做得公眾人物就會俾人批評，冇辦法。」
採訪：卓寶花 攝影：何國豪
