呢幾日放工返屋企，經常見條街有人燒街衣，原來又到七月十四呢個撞邪高峯期，阿媽教落呢幾日最好唔好咁夜返屋企，自問個膽大過砂缸的你，會唔會唔信邪，去鬼屋應吓節呢？還是膽細細，放咗工即刻返屋企呢？
記者：區佩嫦
「乜今晚係鬼節呀！我都唔知㖭！中國人咁信邪，邊度會有人專登走去鬼屋撞鬼，我梗係唔會咁做啦！今晚放咗工應該會返屋企，始終屋企都較為傳統，唔會搞咁多嘢！」
「咁啱今晚輪到我返夜更，所以無諗過今晚做乜。若果唔使返工的話，我諗我會租一大堆鬼片返屋企慢慢睇，當係應吓鬼節嘛！（乜你好似過萬勝節咁？）我諗我行得正企得正，又無得罪人或者鬼，應該唔怕！」
「今晚咪去蘭桂坊撞『鬼』囉！夠應節啩！其實今晚有朋友生日，所以先落蘭桂坊玩。
（乜鬼節生日呀？）係啦！我都覺得我朋友邪呀，撞正七月十四生日，今晚一於笑吓佢先。」
「平時鬼節都有幫媽咪燒街衣，我都唔會點驚，不過行街時會小心啲，媽咪話行街踩中路邊燒完的衣紙，會得罪啲鬼，所以我呢幾日行街都特別小心。」