上星期皇馬風暴正式登陸香港，日日都見到碧咸拎住部西門子SL55喺度煲粥，不過西門子貴為皇馬嘅主要贊助商，當然要乘機賣吓廣告。坊間就繼續大吹SL55風，就連配件都別出心裁，專誠推出「SL55配件套裝」，一次過有齊所有配件，包括電池、Handsfree、皮套及充電座，價錢都只係$150，雖然唔係原廠，不過一個「平」字就已經殺晒，淨係買嚿電都咁上下價錢啦。
文：羅新基
Motorola上星期出咗部E365，二千零蚊就有得影相、TFT靚芒同16和弦，又支援Java同MMS，確實非常抵玩，難怪一出場就吸引到唔少手機迷注意，首批E365行貨更會送埋條USBCable同電腦軟件，等用家可以自行創作鈴聲及Wallpaper，不過羅新基見到有啲無良商舖將Cable同電腦軟件抽起分開賣，個價重標到成幾百蚊，認真係無本生利。有心買E365嘅用家記住睇清楚、問清楚，行多幾間做吓功課先扑鎚呀！
7250有內置收音機就大家都知，羅新基坐車搭船解悶都係靠佢，除咗用耳筒聽之外，Nokia同時出咗個收音機座，外形都幾靚仔，插部手機上去一樣可以聽到收音機，而且有條天線加強接收，新推出嗰時就要成400蚊，不過近排價錢就已經逐步回落，而且重愈跌愈有，最新行情已經跌到去$138，可能大家覺得百零蚊買個收音機都得喇，如果係咁就太膚淺啦，呢個收音機座一路播收音機重可以一路充電，所以唔係淨聽收音機咁簡單㗎。